Sekretáriu Estadu Juventude no Traballu (SEJT), Nívio Leite Magalhães.

DILI, (TATOLI) – Bainhira Governu Timor-Leste lahamenus númeru traballadór ilegál iha Korea, maka Korea sei redús kuota ne’ebé aloka mai Timor-Leste no bele mós suspende programa haruka traballadór timoroan ba serbisu iha nasaun ne’e.

Sekretáriu Estadu Juventude no Traballu (SEJT), Nívio Leite Magalhães, hatete Korea suspende ona programa hanesan ne’e ba Vietname no daudaun Timor-Leste iha númeru haat husi nasaun 16.

“Maibé SEJT sei halo esforsu tomak atu buka solusaun ba problema ida ne’e. Problema iha ona ha’u rasik bá to’o iha Korea atu buka solusaun, tanba ne’e mak ami bá ne’e atu buka hatene tanba sá mak sira bele komete irregularidade. Klaru katak hahalok ida ne’e viola ona MOU (memorandum of understanding) ne’ebé selebra entre nasaun rua, promesa no deklarasaun ne’ebé traballadór ida asina antes sira bá Korea nomós lei Korea nian rasik”, Nívio hatete iha Kaikoli, ohin.

Nune’e SEJT sei asegura programa ida ne’e atu kontinua bá oin no implementa ho di’ak.

“Sira balun fila ona voluntariamente no balun seidauk fila, agora parte SEJT tenke kria kondisaun bainhira traballadór sira ne’e fila, bele kontinua tau matan ba sira. SEJT iha programa auto empregu, formasaun no seluk tan no sei disponivel ba traballadór sira ne’ebé fila, la’ós de’it ba sira ne’ebé komete irregularidade, maibé ba sira ne’ebé remata ona kontratu, sira filafali mai SEJT sei fó apoiu ba sira”.

Atu nune’e labele kria tan dezempregu iha país ne’e tanba planu ne’e iha, kontinuidade husi programa Governu da-neen iha para asegura ida ne’e.

Traballdór timoroan ilegál iha Korea hamutuk 474 ne’ebé bele fó impaktu boot ba Governu Korea hodi bele halo redusaun ba kuota ne’ebé fó.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here