Sekretáriu Estadu Juventude no Traballu (SEJT), Nívio Leite Magalhães. Foto/Egas Cristóvão.

DILI, (TATOLI) – Sekretáriu Estadu Juventude no Traballu (SEJT), Nívio Leite Magalhães, hatete traballadór timoroan ne’ebé konsidera ilegál tuir lei imigrasaun Korea nian iha kategoria tolu mak balun troka sira-nia serbisu sein autorizasaun husi empregadór, abandona serbisu no balun ne’ebé ramata ona kontratu, maibé lakohi fila mai Timor-Leste.

Nune’e bolu timoroan sira ne’e sai ilegál tanba viola ona immigration control act, artigu 17 no viola memorandum of understanding (MOU) ne’ebé uluk asina ona iha tempu Sekretáriu Estadu ba Polítika Formasaun Profisionál no Empregu (SEPFOPE) ho Ministru Empregu no Traballu Korea nian iha momentu ne’ebá, nomós viola parágrafu 15 ne’ebé ko’alia sobre medida ne’ebé foti ba traballadór ilegál sira.

“Iha parágrafu 15, númeru 8 ko’alia kona-ba oinsá tratamentu ba traballadór ilegál no implikasaun saida maka sira bele halo bainhira laiha redusaun ba númeru traballadór sira ne’e. Refere mós ba karta ida ne’ebé sira haruka mai ita iha 27 fevereiru ne’ebé ko’alia kona-ba traballadór ilegál, liga ba ne’e hakarak mensiona traballadór sira ne’ebé komete irregularidade sira ne’e viola ona promesa traballadór Timor-Leste númeru ida ne’ebé sira halo ho Governu katak sei promete atu la sai ilegál hodi kumpri nafatin ba lei no regulamentu Korea nian”, Nívio hato’o ida ne’e liuhusi konferénsia imprensa ne’ebé hala’o iha Kaikoli, ohin, hodi fó sai rezultadu vizita ofisiál iha loron 12 to’o 18 marsu foin lalais ne’e.

Aleinde ne’e deklarasaun ne’ebé traballadór ida-idak halo antes bá Korea, iha númeru 3 ne’ebé deklara katak sira sei halo knaar hanesan traballadór ho responsabilidade ba TL nia soberania no naran moos iha sira-nia serbisu fatin no garante katak sei la sai traballadór ida ne’ebé ilegál iha Korea Súl.

“Husi ne’e ha’u bá enkontru ho traballadór sira. Hasoru mós sira barak ne’ebé lei Korea kosidera ilegál, hodi buka atu rona no komprende didi’ak sira-nia kondisaun, tanba sá mak bele halo sira sai ilegál”.

Liuhusi informasaun ne’ebé traballadór sira hato’o nomós enkontru ho Prezidente Dezenvolvimentu Rekursu Umanu no Ministériu Empregu no Traballu Korea nian maka hanesan governante ida tenke buka solusaun.

“Ha’u hasoru kuaze sira hotu iha fatin Guri, Gumi, Incheon, Seol no fatin seluk, hanoin ida atu bá fatin ida naran Busan atu hasoru traballadór ne’ebé serbisu iha tasi-laran, maibé lakonsege tanba tempu. Ha’u deskobre problema balun ne’ebé kontribui ba kestaun ilegál ne’e”.

Balun lakohi fila mai bainhira remata serbisu, balun troka serbisu no abandona serbisu tanba sente todan no balun mós tanba empregadór sira larespeita kontratu ne’ebé selebra ona ho sira hanesan atu bá ka’er ikan, maibé realidade haruka sira bá la’ós de’it ka’er ikan, maibé bá haree karau, balun atu bá haki’ak ikan, haruka mós bá kuda modo, lori karreta no seluk tan.

“Iha mós balun hetan tratamentu ladi’ak, ezemplu sira-nia pasaporte bainhira sira hahú serbisu empregadór balun foti tiha no balun to’o so’e ba tasi nomós seluk tan”.

Tanba ne’e SEJT sei halo esforsu hotu atu nune’e traballadór timoroan hetan tratamentu dignu di’ak no dignu.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here