Primeiru-Ministru, Mari Alkatiri, ho CEO Timor Telecom asina nota intendementu, iha Palasiu Governu, tersa, (20/3). Foto Antonio Goncalves

DILI, (TATOLI) – Governu ho operadór Timor Telecom (TT) asina nota entendimentu atu hahú implementa instalasaun no konfigurasaun fibra ótika rede nasionál nu’udar backbone network (koneksaun ho velosidade aas no sai pontu prinsipál ba rede ida) hodi halo ligasaun doméstiku nian.

“Horisehik ita lansa ona fibra ótika kabu submarinu para atu liga ita ba liur, ida ne’e ligasaun doméstiku internu nian”, tenik Primeiru-Ministru, Marí Alkatiri, ba jornalista sira iha Palásiu Governu, tersa, (20/3).

Hodi dehan TT mak manan ba konkursu rede nasionál, nune’e lakleur tan Timor-Leste bele iha koneksaun hodi nível nasionál hotu bele hetan asesu.

Parte seluk Vise Ministru Obras Públikas, Transporte no Komunikasaun, Inácio Moreira, hateten agora dadaun iha ona pontu koneksaun iha rai laran atu liga rede ba instituisaun públiku sira iha distritu ida-ida, nune’e TT sei implementa projeitu ne’e nu’udar protokolu rede (NCP-Network Control Program) atu halo konfigurasaun no operasaun rede doméstika.

Bainhira iha ona kondisaun bele hahú husu rekursu umanu atu halo instalasaun ba e-government, ho ida ne’e instituisaun sira bele servisu ho dijitalizasaun.

“Estadu tenke modernizadu no halai tuir nasaun dezenvolvidu sira ne’ebé la’o ona uluk no hein katak lalais ita tenke toman, importante mak ita hahú ona”, dehan.

Tuir governante ne’e, ho investimentu fibra ótika sei ajuda aselera liután servisu no hasa’e kualidade internet ho kapasidade boot no velosidade aas.

Entretantu projetu ne’e inisia husi VI governu konstitusionál ne’ebé hetan aprovasaun husi Konsellu Administrasaun Fundu Infrastrutura (KAFI) iha Novembru 2016 no liu prosesu normal, hahú estimativa planu orsamentu Ajénsia Dezenvolvimentu Nasionál (ADN) no prosesu konkursu liuhosi Komisaun Nasionál Aprovizionamentu (CNA-sigla portugés).

Projetu ne’e ho naran Suppy, Installation, Configuration and Commisioning National Optical Fiber Backbone Network sei implementa husi ICT e-Government gabinete Primeiru-Ministru no vensedór TT.

Projetu ne’ebé asina iha 15 Novembru 2017 sei fó importánsia boot ba dezenvolvimentu iha rai laran, halai liu ba área teknolojia, informasaun no komunikasaun tanba sai hanesan infrastrutura báziku atu implementa sistema Governu Elektróniku (e-Goverment) ne’ebé mensiona iha Planu estratéjiku Dezenvolvimentu Estratéjiku 2011-2030 (PEDN).

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here