Governu lansa investimentu fibra otika. Foto GPM/Samuel

DILI, (TATOLI) – Primeiru-Ministru (PM), Marí Alkatiri, hateten governu ne’ebé nia lidera fó prioridade ba investimentu telekomunikasaun tanba ohin loron iha mundu globalizadu, izolamentu ne’ebé halo ema kiak mak komunikasaun, nune’e bainhira komunikasaun laiha kualidade no kustu karun sei halo kleur iha kontaktu.

“Sétimu governu konstitusionál fó prioridade absoluta ba investimentu kabu submarinu ho teknolojia fibra ótika atu fulan hirak tuir mai bele aselera komunikasaun no hatun folin, nune’e impaktu ba ekonomia boot tebes”, tenik iha ninia intervensaun iha seremónia lansamentu investimentu fibra ótika iha Timor Plaza, segunda, (19/3).

Nune’e Xefe Governu fó parabéns ba empreza rua ne’ebé atu halo investimentu iha área telekomunikasaun.

Parte seluk Vise Ministru Obras Públikas, Transporte no Komunikasaun, Inácio Moreira, hatutan investimentu husi kompañia Telin (Telkom International) no Moratelindo hanesan proposta ne’ebé aprezenta ba governu foin lais iha Konsellu Ministru ho hanoin hakarak halo investimentu puru no fó golden share to’o pursentu 30.

Nune’e governu simu, tetu no deside hodi halo lansamentu ba investimentu atu dezenvolve no aselera internet di’ak liután ho bandwidth dedicated (velosidade download no upload hanesan) ho banda larga ne’ebé sei ajuda atividade oin-oin iha termu uzu informasaun no teknolojia ne’ebé efisiente no efetivu.

Nia dehan, rede internet ne’ebé oras ne’e dadauk uza ho kualidade no kapasidade seidauk naton, liu-liu kustu ne’ebé aas liu, tanba sei uza rede satelit, ho nune’e nia garante investimentu ne’e sei hetan benifísiu boot.

“Ha’u fiar no garante katak ho investimentu ida ne’e Timor-Leste sei hetan benifísiu boot tanba iha redusaun ba kustu internet to’o pursentu 400 kompara ho kustu internet ohin loron”, katak.

Kona-ba seguransa no kontrolu komunikasaun iha área telekomunikasaun, nia parte nu’udar órgaun kompetente sei mobiliza rekursu iha termu rekursu umanu, lejislasaun no ekipamentu nessesariu atu bele fó atensaun no prevensaun seguransa no kontrolu komunikasaun.

Entretantu investimentu telekomunikasan ne’e sei halo instalasaun fibra ótika iha tasi okos husi Atambua mai Dili no husi Alor mai Dili ho durasaun fulan neen ou hitu.

Rede satelit ne’ebé agora uza dadauk ho kustu aas no sensitivu ho klima, liu-liu udan enkuantu fibra ótika hanesan kabu kiik ne’ebé bele transfere dadus barak ho velosidade aas ho kustu kiik ba liña internet.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here