Peace Boat. Foto/Google.

DILI, (TATOLI)-Peace Boat (Ró Pás) husi Japaun ne’ebé lori pasajeiru husi nasaun barak ho ema pur volta 600 vizita Timor-Leste.

Vizita ida ne’e tanba liuhusi programa entre Timor-Leste no Japaun nu’udar país amigu nomós nasaun ida ne’ebé sai hanesan modelu ba iha dezenvolvimentu pás iha mundu nian.

Aleinde ne’e Timor-Leste hanesan destinu turístiku maka pasejeiru sira ne’e hili Timór hodi haree ho besik.

Ministru Turizmu (MT), Manuel Vong, hatete turista sira ne’e bá vizita fatin turístika hanesan Maubara, Likisá, Muzeu Rezisténsia, Kristu Rei no haleu iha Dili laran liuliu fatin hirak ne’ebé sira hili atu bá haree.

“Ministériu Turizmu rasik mós organiza espozisaun ki’ikoan ida iha Sentru Informasaun Turístika, Bidau-Lesidere hodi bele akolla sira atubele haree nomós sosa ita-nia komunidade sira-nia sasán ruma ne’ebé mak sira fa’an”, Vong hatete iha Portu Dili, ohin, bainhira simu bainaka sira ne’ebé mai vizita Timor-Leste.

Objetivu prinsipál husi vizita ne’e atu hametin relasaun entre nasaun rua ne’e nomós enkuadra Timor-Leste iha mundu tomak nia leet tanba vizitante sira ne’e mai husi país oioin.

“Nune’e tulun ita atu divulga Timor-Leste ba mundu nomós lori munda mai Timór”.

Ministru relata bainhira ko’alia ho bainaka balun katak sira admira tebes Timor-Leste hanesan nasaun ida bonita, kapa’as, nia ema mesak di’ak “entaun mai ita hotu sai hanesan uma-na’in di’ak hodi bele oferese ospitalidade ida ne’ebé di’ak”.

“Ró na’in mós hatete nia sei hakarak atubele lori ró ne’e vizita regularmente mai Timór no señor Ramos Horta mós sei sai hanesan guest spiker iha ró laran entre viajen husi Dili bá Denpasar-Bali (Indonézia). Ha’u hanoin ne’e hanesan oportunidade ida di’ak ba Timór, mai ita hametin pás no estabilidade, lori ita-nia rai ne’e hetan nia liberdade totál no bele halo dezenvolvimentu liuhusi setór turizmu, kontribui bá iha ita-nia libertasaun pátria, nasaun, povu atu hetan moris di’ak ba ema tomak”.

Director of Peace Boat, Nohira Shinsaku, hatete tinan 18 liubá Peace Boat ba dahuluk vizita ona Timor-Leste no momentu ne’e iha ajenda barak mak hela iha komunidade lokál nia uma no lahaluha ospitalidade ne’ebé di’ak tebes no sira kontente hodi vizita tan nasaun ne’e.

“Iha futuru ami sei lori ema barak mai vizita Timor-Leste. Ha’u hanoin ami gosta ospitalidade ema Timór nian no ami bele aprende barak esperiénsia timoroan nian tanba ema Timór nia esforsu ba iha prosesu independénsia no rekonsiliasaun no halo esforsu boot ba pás. Ami hakarak haforsa relasaun entre Peace Boat ho Timor-Leste dalaida tan”.

Notísia ne’ebé relasiona :

http://www.tatoli.tl/2017/08/peace-boat-cruise-sei-vizita-timor-leste/

(Jornalista : Merry Freitas)

(Editór : Manuel Pinto)

HAKEREK NO HATÁN

Please enter your comment!
Please enter your name here