Prezidente Tribunál Rekursu foun, Deolindo dos Santos bainhira halo intervista ho jornalista sira iha Palásiu Prezidensiál. Foto Tatoli/Antonio Goncalves

DILI (TATOLI) –Aprezentasaun lista kandidatura ba Tribunal Rekursu (TR) sei remata iha loron 22 Marsu hafoin kontinua halo verifikasaun to’o loron 10 prazu simu lista no sei remata iha loron 1 Abríl, maibé agora daudauk Tribunál foin simu husi Partidu Polítiku (ParPol) ida no koligasaun ida.

ParPol ne’ebé mak aprezenta ona lista kandidatura mak Partidu Republikanu (PR) no koligasaun Movimentu Dezenvolvimentu Nasionál (MDN) husi ParPol haat no koligasaun haat ne’ebé rejistu atu konkorre iha eleisaun antisipada.

Prezidente Tribunal Rekursu, Deolindo dos Santos hateten iha ParPol 10 resin mak foti ona lista kandidatura maibé foin rua mak aprezenta ona no TR kontinua prosesu verifikasaun.

“Horisehik iha lista kandidatura rua mak hatama ona no ami prosesa halo verifikasaun daudauk ona no husu STAE atu hare kestaun balun mak lei regula para hare buat ne’e di’ak liu tan”, tenik ba jornalista iha Palásiu Governu, ohin.

Nia informa tan, iha koligasaun haat kompostu husi Parpol 15, maibé sei aprezenta de’it lista haat no ParPol ne’ebé avansa mesak.

“Alende koligasaun haat iha partidu seluk ne’ebé sei avansa individualmente, signifika katak sei iha lista kandidatura ne’ebé mak bele to’o 10 resin konforme partidu sira ne’ebé foti lista kandidatura ne’e sira hatama hotu lista”, nia dehan.

Hafoin remata prazu mak bele hatene lista hira mak tama, maibé agora sei la’o hela, prazu to’o bain rua tuku lima loraik.

Entretantu to’o loron konstituisaun koligasaun partidária loron 12 Marsu, ParPol haat no koligasaun haat mak rejistu ona atu konkorre iha eleisaun antisipada.

ParPol haat kompostu husi Partidu Demokrátiku (PD), Frente Revolusionária Timor-leste Independente (FRETILIN), Partidu Esperansa da Pátria (PEP) no Partidu Republikanu (PR)

Koligasaun haat mak Movimentu Sosiál Demokrata (MSD) kompostu husi Partidu Sosialista Timor (PST), partidu Sosiál demokrata (PSD), Partidu Demokrátiku Cristão (PDC) no Centro Accão Social democrata Timorense (C-ASDT), Aliansa Mudansa ba Progresu (AMP) kompostu husi Congresso Nasional Rekonstrusaun Timor-Leste (CNRT), partidu Libertasaun popular (PLP) no Kmanek Haburas Unidade Nasional Timoroan (KHUNTO).

Movimentu Dezenvolvimentu Nasionál (MDN) kompostu husi Asosiasaun Popular Monarkia Timorense (APMT), partidu Liberta Povu Ai leba (PLPA), Movimentu Libertasaun Povu Maubere (MLPM) no Unidade Nasionál Demokrátika Rezisténsia Timorense (UNDERTIM), no Frente Dezenvolvimentu Demokrátiku (FDD) kompostu husi Partidu Unidade Dezenvolvimentu Demokrátiku (PUDD), Partidu União Demokrátiku (UDT), Frente-Mudansa no Partidu Dezenvolvimentu Nasionál (PDN).

(Jornalista: Julia Chatarina)

(Editór : Manuel Pinto)

HAKEREK NO HATÁN

Please enter your comment!
Please enter your name here