José Reis. Foto espesiál

DILI (TATOLI)—Membru Sétimu Governu Konstitusionál hosi partidu FRETILIN sei la tama iha lista deputadu/a ba Parlamentu Nasionál (PN) períodu 2018-2023.

Informasaun ne’e hato’o hosi Sekretáriu Jerál Adjuntu FRETILIN, José Reis ba jornalista sira iha sede Komité Sentrál FRETILIN (CCF-sigla portugés), Fatuhada, Comoro, Dili, sábadu (17/3), hafoin reuniaun Komisaun Polítika Nasionál (CPN-sigla portugés) hodi deside lista ba membru PN.

José Reis informa só membru Governu na’in rua de’it maka tama iha lista membru Parlamentu Nasionál maka hanesan atuál Primeiru Ministru, Marí Alkatiri reprezenta estrutura nivel altu partidu no José Agostinho Sequeira “Somotxo” reprezenta veteranu.

Desizaun ida ne’e CPN foti, nia esplika, bazeia ba rezultadu konferénsia nasionál FRETILIN ne’ebé hala’o iha Maliana, Munisípiu Bobonaru, Fevereiru liu-ba, iha ne’ebé konferensista sira hosi munisípiu 13 deside membru Governu labele tama iha lista membru PN.

“En-prinsípiu, laiha mudansa boot ba lista membru Parlamentu Nasionál. Só membru Governu de’it maka la tama, nune’e fó fali fatin ba kuadru sira seluk hodi inklui iha lista ba uma fukun reprezentante povu,” Reis afirma.

(Jornalista: Xisto Freitas)

(Editór : Manuel Pinto)

HAKEREK NO HATÁN

Please enter your comment!
Please enter your name here