DILI, (TATOLI) – Koligasaun partidaria Aliansa Mudansa ba Progresu (AMP) ohin aprejenta ona lista membru Parlamentu Nasionál (PN) hamutuk ema nain 90 kompostu hosi deputadu permanente 65 inklui suplente 25 ba Tribunál Rekursu (TR).
“Ohin ami rejistu ona no ami kumpri ona rekezitu no prontu hodi kompete”, dehan Prezidente Komisaun Mídia iha Konsellu Diretiva AMP, Mericio Juvinal
Akara ba jornalista sira iha TR, Kaikoli.
AMP mós kumpri kritéria ida maka feto númeru tolu iha lista ne’e no totál feto hamutuk 31 ba membru kandidatu PN.
ʺHothotu maihosi partidu tolu ne’e, balun membru estrutura altu, reprezentasaun hosi munisípiu, feto no laiha ida maka maihosi liurʺ, afirma.
Tuir nia lista ne’e AMP hili tuir kritéria partidu tolu no hetan konkordansia hosi AMP. ʺPartidu tolu kontente ho lista kandidatura ne’eʺ, hateten Akara.
AMP maihosi koligasaun partidu hanesan Kongresu Nasionál Rekonstrusaun Timor (CNRT-sigla portugés), Partidu Libertasaun Populár (PLP), Kmanek Haburas Unidade Nasionál Timor Oan (KHUNTO).
Hosi lista ne’e, Prezidente partidu CNRT, Xanana Gusmão, okupa númeru dahuluk, tuir kedas Prezidente PLP, Taur Matan Ruak no Prezidente KHUNTO, Armanda Berta dos Santos.
Komposizaun kadeira mak CNRT 40 resin, PLP no KHUNTO kadeira 20 resin.
Jornalista: Agapito dos Santos
Editora: Rita Almeida
