DILI, (TATOLI) – Reitór Universidade Orientál Timor Lorosa’e (UNITAL), Roberto Miranda Seixas Jerónimo, husu ba estudante sira atu aprende língua ofisiál portugeza tanba abut iha ona Timor-Leste (TL) nomós husu atu joven sira hodi kontinua luta.

“Ita-nia língua ofisiál portugés ne’e importante, ita-nia polítiku sira deside hanesan língua ofisiál, tanba ne’e mak estudante sira tenke luta nafatin lian portugeza porque ida ne’e ita-nia lian”, responde reitór UNITAL iha kampus UNITAL, Bekora, ohin, ligadu ho preokupasaun estudante sira nian kona-ba universidade sira la uza lian ofisiál ho efetivu hodi hanorin.

Nia dehan lian nu’udar abut hosi kultura. “Portugal labele mai impoen, ita tenke halo ida ne’e, portugés ne’e polítika ita nian”, afirma.

Reitór konsidera lian portugés importante tebes tanba nu’udar lian ne’ebé ko’alia barak da-haat iha mundu alende Mandarin, Español no Inglés.

Entretantu, embaixadór Portugal, José Pedro Machado, hatan ba preokupasaun estudante no profesór timoroan sira kona-ba materiál didátiku sira ho lian portugés sei mínimu liliu iha universidade katak Portugal sempre nakloke hodi fasilita, maibé husu mós ba universidade atu halo parseria ho universidade portugeza sira tanba universidade sira iha ne’ebá ne’e autonóma.

“Iha sentru kulturál portugeza iha biblioteka ida nakloke hela ba komunidade sira hotu; portugés no timoroan sira. Frekuentadu husi estudante timoroan sira talvez seidauk iha kuantidade kona-ba tipu livru tékniku sira maibé kualker forma, nesesidade inisiativa ida ne’e, tenke hahú husi kada universidade, pois ami estuda maneira oinsá mak bele apoia”, dehan embaixadór José Pedro.

“Biblioteka ida ne’e agora funsiona husi tersa to’o sesta, hahú tuku 9.00 to’o tuku 17.00 no sábadu dader”, informa diplomata portugés ne’e ba TATOLI.

Tuir site Internet World Stat, língua portugés ne’ebé apar ho tetun nu’udar língua ofisiál husi loron ba loron aumenta bebeik no nu’udar lian da-lima ne’ebé uzadu liu iha internet; sibernauta na’in 82,5 millaun husi país sira iha kontinente lima iha mundu ne’e.

Númeru utilizadór internet iha portugés aumenta pursentu 99 entre tinan 2000 no 2011, maibé tempu ne’ebá reprezenta de’it pursentu 3,9 husi totál sibernauta sira no pursentu 32,5 husi totál falante sira iha mundu ne’e.

Iha Facebook, portugés nu’udar lian ne’ebé uza liu no tuur iha pozisaun datoluk, inglés ba pozisaun dahaat no español da-lima. Katak, língua portugés nia utilizadór sira hamutuk rihun 585; inglés nia utilizadór hamutuk milaun 359 no español nia utilizadór hamutuk rihun 142. Alende ida ne’e, ho aumentu liu pursentu 800 entre 2010 e 2012.

Nune’e mós iha Twitter, portugés mós nu’udar terseira língua ne’ebé uzada liu, reprezenta pursentu 12 husi totál tweets sira ne’ebé haruka ona tuir mai ingles ho pursentu 39 no japones ho pursentu 14.

Tuir dadus estatístiku Observatório da Língua Portuguesa katak ema ne’ebé ko’alia portugés hamutuk 244,392.

Ko’alia iha kontinente lima língua portugés nu’udar língua ofisiál Angola (19,8 milhões de habitantes), Brasil (194,9 milhões), Cabo Verde (496 mil), Guiné-Bissau (1,5 milhões), Moçambique (23,3 milhões), Portugal (10,6 milhões), São Tomé e Príncipe (165 mil), Timor-Leste (1,1 milhões) seidauk inklui Guiné Equatoriál.

Língua ne’e mós ko’alia iha fatin sira ne’ebé mak istorikamente Portugal pasa ona, iha tempu navegasaun no kontamporanea hanesan Macau, Goa (Índia) no Malaca (Malázia).

Bazea mós ba relatu Observatório da Língua Portuguesa, portugés mós ko’alia barak liu emisfériu sul, ho falante rihun 217 iha Angola, Brasil, Moçambique, São Tomé e Príncipe no Timor-Leste.

Entre língua europeia sira seluk, portugés mosu nu’udar “terceira língua mais falada” no estudu ida husi Bloomberg konsidera nu’udar lian ne’e nu’udar lian da-neen ne’ebé uzada liu iha mundu eh atividade negósiu.

Konstituisaun Repúblika Demokrátika Timor-Leste mós konsagra ona iha artigu 13o [lian ofisiál no nasionál] katak lian ofisiál Timor-Leste nian mak Tetun no Portugés.

Notísia relevante; https://observalinguaportuguesa.org/graficos-o-estatuto-da-lp-no-mundo/

Nune’e mós; http://www.catedraportugues.uem.mz/?__target__=lista-bibliografia-timor-leste

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here