VARANDA NASIONÁL AMP Ofisializa Lista Deputadu Parlamentár

AMP Ofisializa Lista Deputadu Parlamentár

March 16, 2018

1425

DILI, (TATOLI) – Koligasaun Aliansa Mudansa ba Progresu (AMP) ne’ebé kompostu hosi partidu Kongresu Nasionál Rekonstrusaun Timor (CNRT-sigla portugés), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO) ohin ofisializa lista deputadu Parlamentu Nasionál (PN) hamutuk 90.

“Ami ofisializa lista kandidatura deputadu Parlamentu Nasionál (PN) liuhosi asinatura no lé sai ba públiku”, Prezidente Partidu CNRT, Kay Rala Xanana Gusmão, deklara iha sede CNRT, Bairu Grilos.

Nune’e, AMP aprezenta lista kandidatura parlamentár ba povu tomak.

Hodi afirma: “Ho bensaun maromak nian ne’ebé iha, ita fiar ba rai lulik, uma lisan no sei la sama ruin ho ran ne’ebé nakfakar, enkuantu, povu fó fiar mai AMP sei serbí ho laran tomak hodi lori povu ba moris di’ak”.

Tanba ne’e, AMP nia lema mak “hamutuk no hametin nasaun” tanba prosesu harii nasaun no konstrusaun Estadu ita sei iha problema, nune’e duni AMP hamutuk ho hanoin moos, laran moos no hahalok moos atu hasai povu hosi kiak no mukit, afirma tan.

Xanana hatutan AMP la’os di’ak liu iha mundu no la’os aat fali iha infernu maibé AMP iha nia identidade rasik katak maske diferente maibé labele hatudu hahalok ne’ebé hatauk fali povu.

Enkuantu, AMP tenke servisu maka’as iha nasionál, postu administrativu, munisípiu no to’o baze maibé la’os atu hamaus, la’os atu ameasa no la’os atu ba sosa votu.

Entretantu, kompozisaun lista kadidatura deputadu ba PN hosi AMP hamutuk 90, enkuantu 35 kadeira hosi AMP iha PN hetan konsensu mutua hodi mantein, nune’e 36 to’o 90, partidu CNRT hamutuk 19, PLP, 18 no Khunto 18, maske lista hamutuk 90 maibé Tatoli foti sampél naran 65 nudar reprezentasaun ba lista naran tomak mak hanesan tuir mai.