Primeiru-Ministru bainhira fó sertifikadu ba kompañia hodi hahú konstrusaun Portu Tibar. Foto António Goncalves

DILI, (TATOLI) – Ministru Planu no Finansa, Rui Gomes, hateten prosesu konstrusaun ba portu Tibar bele hahú ona iha tinan ne’e,  tanba goverenu aloka ona orsamentu millaun 130 hosi fundu minarai nomos finaliza ona estudu ambientál.

Eis Xefe Kaza Sivíl husi Xefe Estadu anterior Taur Matan Ruak hato’o hafoin akompaña Primeiru-Ministru, Marí Alkatiri, hodi entrega sertifikadu lisensa ambientál ba Diretór  kompañia Timor Port Eric Machini  hodi hahú konstrúsaun kinta ne’e iha Tibar, munisípiu Likisa.

ʺFundu hosi governu nian ami kompleta ona, agora hein de’it hosi kompañia kompleta buat balun hodi mobiliza ekipamentu para hahú”, dehan nia.

Governu aloka  millaun $130 no kompañia Timor Port no Bolloré hamutuk $140 totál $270 ba faze inisiu ba konstrusaun portu Dili ho durasaun tinan tolu.

Maibé governante realsa totál investimentu orsamentu ba portu Tibar to’o tinan 30 ho valór millaun $500.

Kompañia ne’e maka sei halo jestaun durante tinan 30 depois entrega ba governu TL.

Primeiru-Minístru, Marí Alkatiri, hateten portu Tibar hanesan investimentu ida boot ba ekonomia Nasaun.

ʺProjeitu ne’e sei muda vida ekonomia Timor-Leste nian sei loke servísu barak  ba komunidadeʺ, dehan Xefe Governu.

Fundu ba konstrusaun portu Tibar mai hosi mina no gas, tanba ne’e tenke implementa ho kualidade.

Maibé governante konfia Kompañia internasionál Bolloré iha kapasidade hodi implementa obra ne’e.

Tuir kompromisu kompaña Timor Port sei fó servisu ba timoroan 500 durante prosesu konstrusaun ne’e tinan tolu, depois portu halo ona operasaun sei fó tan servisu ba timoroan to’o pursentu 75.

Entretantu kompañia China Harbour maka kria dezeñu ba portu Tibar.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here