Primeiru Ministru, Marí Alkatiri .

DILI (TATOLI)–Oitavu Governu Konstitusionál ne’ebé atu mai hafoin eleisaun antesipada iha 12 Maiu, sei responde preokupasaun kona-ba fasilidade seguransa iha fronteira Marítima.

Primeiru Ministru, Dr. Marí Alkatiri hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, kinta ne’e, hodi hatán lider Forsas Armadas ne’ebé preokupa kona-ba Timor-Leste seidauk iha ró atu halo patrullamentu iha Fronteira Marítima entre TL no Austrália.

Nia dehan kuandu iha fronteira ona, Timor-Leste tenke iha kapasidade defende territóriu, maibé la signifika tenke harii uluk kapasidade maka halo negosiasaun fronteira.

“Ita tenke iha konxiénsia katak hosi ne’e ba oin bainhira iha orsamentu loloos iha Governu foun tenke tau ona kondisaun para hasa’e kapasidade F-FDTL no PNTL ninian, tanba bainhira akontese buat ruma iha ita nia territóriu, ita tenke iha kapasidade atu ajuda salva rikusoin sira iha Tasi,” Xefe Governu informa.

Nia dehan kapasidade ne’ebé presiza maka tenke iha ró patrullamentu boot no aviaun atu kontrola lalehan no tasi.

“Austrália promete ona atu ajuda ró ba TL atu kontrola fronteira tasi, maibé iha ponta finál iha akordu fronteira Marítima ne’e ita soke malu, katak Xefe Negosiadór Prinsipál, Kay-Rala Xanana Gusmão hasai karta ida krítika Austrália no ONU, ne’e bele kria klima ida ne’ebé susar tebes halo relasaun ho Austrália, maibé fiar katak Austrália ne’e Estadu direitu, tanba ne’e kuandu deside ona buat ida kontinua konsistente,” Marí haktuir.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here