Komandante Operasaun Servisu Migrasaun, Inspetór Polísia Fortunato Fausto Guterres.

DILI, (TATOLI) – Komandante Operasaun Servisu Migrasaun, Inspetór Polísia Fortunato Fausto Guterres, hateten sidadaun estrangeiru hamutuk 129 maka viola vistu turista hodi servisu iha Timor-Leste hahú janeiro to’o marsu 2018.

ʺSira ne’e ami prosesu ona hodi aplika multa ba kofre estaduʺ, dehan nia ba Tatoli, kuarta, (14/3) iha Kaikoli.

Maibé, nia la mensiona montante multa hira maka ema estrangeiru sira ne’e selu ona ba kofre estadu tanba sei iha prosesu.

Tuir lei migrasaun azilu númeru 11/2017,  24 maiu iha artigu 143 no 144 regula kona-ba multa ba sidadaun estrangeiru ne’ebé  viola vistu no seluktán.

Ema estrangeiru ne’eb’e viola vistu sei selu multa $250, kompañia ne’ebé fó servisu sei selu $750 to’o 1.500.

Imigrante ne’ebé hela permanensia illegál liu ona fulan tolu multa $580, enkuantu empreza estranjeiru ne’ebé viola vistu selu $1000.

Entretantu tuir dadus estatistika servisu migrasaun rejistu iha 2017, sidadaun Indonézia 860, Xina 215, Kambodia 22, Vietname 18, Austrália 10, Banladesa 10, Malázia neen, Índia lima, Nepál haat, Koréa tolu, Myanmar tolu, Pakistaun rua, Portugal rua, Srilanka rua.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here