Komandante Operasaun Servisu Migrasaun, Inspetór Polísia Fortunato Fausto Guterres.

DILI, (TATOLI) – Komandante Operasaun Servisu Migrasaun, Inspetór Polísia Fortunato Fausto Guterres, hateten rezultadu fiskalizasaun ba ótel sira hahú tersa to’o kuarta semana ne’e identifika otél, guest house no apartementu barak la kumpri rekezitu normál tanba laiha livru rejistu ba ema estrangeiru sira.

Bazea ba lei migrasaun azilu númeru 11/2017, ótel nain tenke multa ho montante $250 kada ema bainhira la rejistu ema estranjeiru no timoroan ne’ebé aluga otél.

ʺÓtel hotu iha Dili laran ami halo nota, otél boot sira nia rekezeitu iha maibé otél kiik sira hanesan guest house no apartemen laihaʺ, dehan Komandante Operasaun ne’e ba Tatoli iha Kaikoli, kuarta, (14/3).

Hodi hatutan tan otél nain balun presta ona deklarasaun iha servisu migrasaun hodi kumpri multa ba kofre estadu.

Tuir inspetór polísia ne’e fiskalizasaun no inspesaun ne’e parte ida hodi asegura seguransa iha rai-laran.

ʺAutoridade turizmu nian tenke fó kapasitasaun di’ak ba emprezáriu otél sira hodi kumpri regraʺ, hateten.

Tanba ótel, apartementu no guest house barak iha Dili balun laiha livru rejistu ba visitante no aat liu laiha koñesementu kona-ba data tama no sai.

Maibé komandante migrasaun ne’e la mensiona naran hosi fatin hirak ne’ebé kontra regra normál otelaria.

Fatin sira ne’ebé identifika lokaliza iha área Metiaut, Audian no seluktán.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here