DILI, (TATOLI) – Atu halo distribuisaun ba materiál agríkola nian, Ministériu Agrikultura no Peska (MAP) iha Diresaun Nasionál Agrikultura, Ortikultura no Estensaun halo ona lista atu fahe ekipamentu sira ba munisípiu hitu no irrigasaun neen ne’ebé MAP konstroe, maibé daudaun ne’e labele tanba presiza orsamentu, purkuantu utilizasaun duodésimu ne’ebé daudaun ne’e iha lasufisiente atu halo distribuisaun totál.
Diretór Nasionál Agrikultura, Ortikultura no Estensaun, Amaro Ximenes, hatete atubele fahe materiál sira ne’e presiza orsamentu ne’ebé boot kuaze liu mil $200 (duzentos mil).
“Tanba ita presiza mina, aluga tronton, forklift para hatún no hasa’e, hasa’e iha Dili no hatún iha munisípiu ne’e katak ita lori ema nia forklift ne’e bá iha munisípiu, depois mós orsamentu viajen lokál ba ita-nia staff sira ne’ebé lori sasán, sira monta kedan tanba sasán agora seidauk monta, ne’e presiza osan ne’ebé boot tebes”, Amaro hatete via telemovel, ohin.
Aleinde ne’e seidauk bele halo distribuisaun tanba presiza hetan uluk treinamentu ba staff sira oinsá mak monta no halo operasaun no manutensaun.
“Materiál sira ne’e hotu ita bele hatete foun ba ita, ne’e duni presiza halo treinamentu, tanba ida ne’e mós inklui ba osan duzentos e tal ne’e”.
Ekipamentu agrikultura sira ne’e doasaun husi Repúblika Populár Xina mai Timor-Leste liuhusi akordu ne’ebé asina ho país ne’e iha abríl no outubru 2015 ne’ebé mak kompromete hodi fó apoia ba MAP.
Materiál sira ne’e mak hanesan tratór iha 12, eskavadora rua, mákina kuda hare 10, baku hare no seluk tan. MAP hahú ona identifika fatin atubele tau ekipamentu sira ne’e hodi apoia serbisu agrikultura nian.
Iha momentu halo termu entrega ba ekipamentu agrikultura nian, embaixadór Repúblika Populár Xina, Liu Hongyang, hatete brevemente sei haruka espesialista na’in-hitu atu fó treinamentu ba operasaun no manutensaun mákina nian ba operadór timoroan.
Maski Xina nia ema prontu ona atu mai, maibé kestaun orsamentu ne’e mak labele atu hahú formasaun.
“Problema mak ita-nia orsamentu ba ditribuisaun no treinamentu ba ita-nia ema para halo operasaun, manutensaun no sistema monta ida ne’e mak lato’o”.
Ekipamentu agríkola ne’e sei distribui ba irrigasaun Maliana I no II iha Bobonaru, Oebaba iha Suai-Kovalima, irrigasaun Kasa, Bonuk no Raibere iha Ainaru, Karau Ulun iha Same, Bulutu iha Manatutu no Baukau no fatin seluk ne’ebé identifika atu fornese ba.
Jornalista: Maria Auxiliadora
Editora: Rita Almeida
