Xina Entrega Ona Ekipamentu Agrikultura Nian Ba MAP

0
176
Ekipamentu doasaun husi Xina.

DILI, (TATOLI) – Ministériu Agrikultura no Peska (MAP) liuhusi ministru Estanislau Aleixo da Silva, no  embaixadór Repúblika Populár Xina iha Timor-Leste, Liu Hongyang, ohin ofisializa entrega (handover)  ekipamentu agrikultura nian ne’ebé Governu Xina ajuda mai Timor-Leste.

Ministru Estanislau hatete doasaun ne’e fó ba Timor-Leste liuhusi akordu ne’ebé asina ho Xina iha abríl no outubru 2015 ne’ebé mak kompromete atu fó apoiu ne’e ba MAP.

“Ekipamentu ne’ebé mai hanesan eskavadora, tratór, semeadora manuál no kombinada, autokombinada ko’a depois baku hare no ekipamentu seluk ne’ebé ministériu simu no iha loos altura ne’ebé ministériu presiza ajuda sira ne’e para fó apoia ba ita-nia agrikultór sira”, katak Estanislau iha Komoro, ohin.

Ekipamentu sira ne’e sei tau iha natar sira ne’ebé luan hanesan Maliana, Oebaba, Raibere, no posibilidade sei tau mós iha Uatulari ne’ebé iha natar mas tenke hadi’a hiban sira tanba ki’ikoan entaun ekipamentu sira ne’e labele uza.

“Oebaba tanba irrigasaun boot no rai barak presiza loke tan no loke tuir ekipamentu ne’ebé iha”.

Tanba ekipamentu ne’e entrega ona maka sei haruka mós tékniku xineza sira atu fó treinu ba tratorista no operadór mákina sira oinsá mak atu utiliza materiál sira ne’e ho di’ak.

“Sira sei mai iha ne’e durante fulan ida no depende se ita-nia ema sira aprende no opera di’ak ka la’e”.

MAP sei fahe ekipamentu ne’e tuir kbiit no situasaun ne’ebé haree katak presiza duni no husu ba utilizadór sira atu utiliza ho di’ak.

“Se fila rai, kuda hare karik fase ekipamentu ne’e, bainhira ita kuída ekipamentu ne’e ita bele lori to’o tinan barak. Utilizadór sira serbisu ho didi’ak, tau matan ba ekipamentu sira ne’e, ida ne’e ema fó mai hanesan ekipamentu Estadu nian ne’ebé atu ajuda agrikultór sira no ministériu sei kontinua nafatin serbisu ho ita-nia agrikultór sira para fó apoia. Tinan ne’e ita-nia udan-been di’ak hein katak bailoro ita sei bele halai natar ho di’ak tanba bee iha”.

Materiál agrikultura ne’e daudaun identifika ona mak iha tratór hitu, mákina ko’a haree 25, disko ba tratór hitu, eskavadora rua ne’ebé mak hamutuk unidade 41 no ekipamentu seluk ne’ebé seidauk identifika hotu tanba sei iha kontentór laran.

Embaixadór Repúblika Populár Xina iha Timor-Leste, Liu Hongyang, hatete dezde restaurasaun independénsia Timor-Leste, Governu Xina no Timor-Leste fahe fiar no suporta malu.

“Ami valoriza amizade no kooperasaun no kontinua servisu hamutuk ho Timor-Leste atu haluan kooperasaun. Agrikultura mak baze ba nasaun no iha pozisaun dezenvolvimentu sosiál ekonómiku Timor-Leste nian no ida ne’e hanesan topu prioridade Governu nian”.

Governu Xina hili kooperasaun agrikultura hanesan área importante ida ho Timor-Leste dezde independénsia.

“Ekipamentu agrikultura xina nian inklui tratór, mákina semeadura, mákina kuda, mákina kolleta hare, eskavadora no seluk tan mak buat ida ne’ebé persiza atu dezenvolve iha setór agrikultura iha país bonitu ida ne’e”.

Nune’e brevemente Xina sei haruka espesialista na’in-hitu atu fornese treinamentu ba operasaun no manutensaun mákina nan ba operadór timoroan.

Jornalista: Maria Auxiliadora

Editora: Rita Almeida

Notísia ne’ebé relasiona :

http://www.tatoli.tl/2018/01/map-sei-tau-trator-boot-rua-iha-atabae-no-urlefa/

HUSIK IDA HATÁN