Xanana Agradese Veteranu Sira Ne’ebé Husu Misa

0
359
Xefe negosiadór ba negosiasaun Fronteira Marítima ho Indonézia no Austrália, Kay Rala Xanana Gusmão. Foto dokumentasaun Tatoli

DILI, (TATOLI) – Xefe negosiadór ba negosiasaun Fronteira Marítima ho Indonézia no Austrália, Kay Rala Xanana Gusmão, hato’o nia agradesementu ba veteranu sira ne’ebé organiza ona misa foin lalais ne’e.

“Ha’u agradese ba veteranu sira ne’ebé mobiliza malu husu misa no husu bensa Maromak nian ba ha’u nu’udar timoroan simplis ida ne’ebé kaer metin no sei la  haluha matebian sira nian ran no ruin namkari lemo hosi tetuk to’o foho lolon ne’ebé sai ita nian abrigu iha funu-laran”, haktuir nia liuhosi mensajen vídeo iha konferénsia extra-ordináriu partidu Kongresu Nasionál Rekonstrusaun Timor (CNRT-sigla portugés) iha Sentru Konvensaun Dili (CCD-sigla portugés), ohin.

Eis Primeiru-Ministru, Xanana Gusmão, dadaun ne’e hala’o hela kna’ar iha rai-liur bazeia ba rezolusaun governu númeru 9/2016, loron 3 fulan-fevereiru 2016 nu’udar Xefe Negosiadór ba negosiasaun Fronteira Marítima ho Indonézia no Austrália.

Nia hatutan dadaun ne’e iha rai-liur tanba defende interese Estadu ne’ebé hasoru rai-boot no kompañia boot sira. Atu oinsá povu bele independente ba ekonomia.

Konferénsia ne’e nia afirma hanesan parte ida hosi prosesu konstrusaun Estadu. “Prosesu ida ne’e ita tenke rekoñese katak ita nian Estadu sei frajil, tanba sei frajil mak seidauk too tinan ida ita ba fali eleisaun foun”, afirma.

Buat sira ne’e, katak tan problema Estadu nian tanba ne’e mak CNRT halo konferénsia hodi buka analiza, estuda no diskute.

Hodi hatutan: “Povu ida ne’e matenek tanba hosi sorin ida ha’u rona katak sosiedade Timor buka iha situasaun polítika ida hanesan ita hasoru dadaun, kumpriende didiak valór demokrasia no buka aprende halo interpretasaun ba konstituisaun no lei”.

Lider nasionál ne’e mós nota katak situasaun atuál konvida sosiedade buka loke debate públika kona-ba teoria polítika no atetude umana ne’ebé fasil monu ba tendénsia atu deturba faktu no halo espekulasaun ba situasaun no aat liu, nia hatutan fasil halo barani án ho intimidasaun oioin ba povu kiik.

Tanba ne’e nia hato’o parabens ba povu tomak ne’ebé tuur hakmatek hodi hatudu maturidade polítika ba mundu, no kompromisu ba toleransia no hakribi ba violénsia. “Estabilidade Nasaun nian iha ita hotu nia liman”.

Jornalista: Rita Almeida

HUSIK IDA HATÁN