UNTL Harohan ba Ekipa Delegasaun Delimitasaun Fronteira Marítima

0
197
Estudante UNTL misa iha igreja katedrál, Dili. Foto FB: Lauvy Nyzha

DILI, (TATOLI) – Universidade Nasionál Timor Lorosa’e (UNTL) organiza misa hodi reza ba ekipa delegasaun ba negosiasaun delimitasaun fronteira marítima ne’ebé lidera husi eis-lider rezisténsia, Kay Rala Xanana Gusmão, bainhira ensera atividade orientasaun akadémika tinan létivu 2018 nian.

“Misa ida ne’e mós ita hasa’e ita-nia neon ba Maromak, ita-nia eroi Maun boot, Kay Rala Xanana Gusmão, ho nia ekipa luta hela ba direitu tasi Timor ne’ebé ita atu hetan soberania liután”, dehan reitór, Francisco Miguel Martins, perante estudante sira iha igreja Katedrál, sábadu ne´e.

Nia hatutan soberania hanesan lalehan, rai-maran nomós tasi. “Ita reza barak husu ba Maromak, forsa no kbiit, hasa’e ba Maromak basá ba Aman Maromak la iha buat ida mak labele, ba Nia buat hotu bele”, reitór universidade públika ne’e husu ba sívitas akadémika tomak.

“Husu Nia atu direitu Timor ninian, soberania Timor ninian mai ita. Husi katedrál ida ne’e, hasa’e ita-nia neon, sívita akadémika UNTL tomak hasa’e neon husu Aman Maromak atu jerasaun foun atu aban bainrua sente no goza determinasaun ida loloos delimitasaun fronteira marítima entre Timor-Leste ho Austrália”, afirma.

Durante orasaun fiar nian, UNTL mós husu harohan ba Maromak atu ema riku sira tulun ki’ak, halo rai bokur hodi hetan ai-han barak, husu tulun família sira atu tau-matan ba labarik no klosan sira atu fiar metin, hetan di’ak ba isin no klamar.

Ba UNTL no matebian sira hotu atu resesita (moris hias) ho Kristu, ba sívita akadémika UNTL atu iha kbiit no matenek, haberan aan hodi serbisu, hanoin no estuda maka’as iha tinan létivu 2018.

Ba direitu tasi Timor nian, atu ho laran lu’ak Maromak justisa nia na’in haraik nafatin kbiit ba delegasaun ne’ebé lidera husi Kay Rala Xanana Gusmão atu hetan direitu ne’ebé justu tuir Nia hakarak.

Entretantu, misa hodi reza ba ekipa delegasaun ba negosiasaun fronteira marítima entre Austrália ho Timor-Leste prejide husi padre kapelaun UNTL, Pe. Adriano Ximenes nomós amu selebrante seluk iha ámbitu misa enseramentu ba orientasaun akadémika.

Misa ne’e hetan partisipasaun másimu husi estrutura makro no mikro UNTL nian, estudante foun no tuan liu rihun haat resin inklui mós sarani sira balun.

Jornalista: Rafy Belo

Editora: Rita Almeida

HUSIK IDA HATÁN