Uniaun Europeia no Portugal Apoia Ekipamentu Emisaun BI ba Timor-Leste

0
210
Foto espesiál

DILI, (TATOLI) – Uniaun Europeia no Portugal apoia viatura no ekipamentu emisaun Billete Identidade (BI) ba Ministériu Justisa (MJ), iha  instalasaun DNRN (Direção Nacional de Registos e Notariado), kinta loraik, iha MJ Colmera, iha ámbitu PASP PALOP-TL (Projeto de Apoio à Melhoria da Qualidade e Proximidade dos Serviços Públicos dos PALOP e Timor-Leste).

Serimónia ida ne’e hodi haluan tan servisu no atendimentu públiku kona-ba emisaun BI, atividade ida ne’ebé mak insere iha PASP PALOP-TL ho fundu euro 400.000, hodi asegura sidadaun no proteje ninia identidade pesoál iha munisípiu ne’en; Aileu, Ainaro, Liquiçá, Manatuto, Viqueque no Manufahi, haktuir komunikadu PASP PALOP-TL.

Serimónia ne’e prezide husi Ministra Justisa, Maria Ângela Carrascalão, ho partisipasaun husi embaixadór Portugal iha Timor-Leste, José Pedro Machado Vieira no enkaregadu Negósiu Delegasaun Uniaun Europeia, Alezandre Zafiriou no sasin husi Ministru Prezidénsia Konsellu Ministru, Adriano Nascimento ho Vise-Ministra Negósiu Estranjeiru no Kooperasaun, Adaljiza Xavier Magno no vise-ministru justisa, Sebastião Dias Ximenes.

Alende reprezentante sira seluk husi ministériu sira no Ordenadór Nasionál Fundu Europeiu ba Dezenvolvimentu iha Timor-Leste, formalmente entrega ekipamentu oi-oin ne’ebé mak hola ona iha ámbitu projetu ne’e, liu-liu viatura foun, kumpleta ho komputadór sira, scanners, impresora sira no kámara dijitál ne’ebé sei utiliza ba emisaun BI ba sidadaun timoroan sira husi munisípiu oi-oin.

Ohin, Ministra Justisa Maria Ângela Carrascalão formalmente hala’o lansamentu simbóliku nu’udar primeira emisaun, iha Diresaun Munisipál Rejistu no Notariadu, Munisípiu Liquiça.

Entretantu, PASP PALOP-TL ne’e nu’udar projetu ida ne’ebé mak ko-finansiadu husi Uniaun Europeia ho valór Euro 4.800.000,00, iha ámbitu 10º Fundu Europeu ba Dezenvolvimentu, no ko-finansiadu no ezekutadu husi Camões – Instituto da Cooperação e da Língua, I.P. ho valór Euro 1.000.000,00. Supervizaun ba projetu ne’e asegura husi AMA, I.P. (Agência para a Modernização Administrativa, I.P.).

Iha Timor-Leste, parseiru estratéjiku ba implementasaun PASP mak DNRN (Direção Nacional de Registos e Notariado) husi Ministériu Justisa. Nasaun parseiru sira seluk ne’e mak INFOSI (Angola), NOSi (Cabo Verde), CEVATEGE (Guiné Bissau), INTIC (Moçambique) no INIC (São Tomé e Príncipe), alende entidade responsável sira ba realizasaun projetu nasionál finansia husi PASP PALOP-TL.

Jornalista: Rafy Belo

HUSIK IDA HATÁN