UNDP Entrega Rádiu Mobile ba CRC

0
149
Diretór Nasionál CRC, iha Sekretaria Estadu Konsellu Ministru no Komunikasaun Sosiál, Luis Evaristo Soares

DILI (TATOLI) – Programa asisténsia eleitorál liuhosi UNDP iha Timor-Leste ne’ebé hetan tulun hosi Governu Japaun ohin (Tersa) iha UN Compound UNDP, Kaikoli, entrega tan rádiu mobile ba Centro Rádio Comunidade (CRC- Sigla Portugés).

Diretór Nasionál CRC, iha Sekretaria Estadu Konsellu Ministru no Komunikasaun Sosiál, Luis Evaristo Soares, informa objetivu UNDP entrega rádiu mobile atu utiliza hodi fó asisténsia eleitorál ba komunidade rurál.

“Sira apoia ita rádiu mobile ho pakote tomak atu ita bele instala iha estasaun rádiu iha ne’ebé de’it atu ajuda ema ne’ebé mak la hetan asesu ba jornál, Televizaun iha ámbitu prosesu eleitorál,” Diretór Nasionál CRC, Luis Evaristo Soares ba Jornalista sira hafoin UNDP entrega ekipamentu rádiu mobile iha UN Compound UNDP, Kaikoli, Tersa (27/02).

CRC iha ona ekipa tékniku atu instala rádiu mobile iha munisípiu hotu liuliu iha área rurál atu bele fahe informasaun loloos no kredivel ba komunidade sira.

Maibé ho eleisaun antesipada CRC prepara atu servisu hamutuk órgaun eleitorál atu tranzmite atividade edukasaun sívika nu’udar pakote informativu iha ámbitu festa demokrasia.

“Atividade hirak sei tranzmite mak edukasaun sívika, entaun ita hakbesik ba Komisaun Nasionál Eleisaun (CNE-Sigla Portugés) ho Sekretariadu Tékniku Administrasaun Eleitorál (STAE) hodi haree meiu oinsá mak ekipamentu hirak ne’e prodúz ba pakote informativu hodi lori ba área ne’ebé mak la asesu mídia,” dehan nia.

Tanba ne’e, órgaun eleitorál importante atu sai parseiru di’ak hodi fahe informasaun loloos no kredivel ba públiku eh komunidade sira iha área rurál ne’ebé balun la asesu rádiu, jornál no televizaun.

Enkuantu, ekipamentu hirak ne’e entrega ona no ekipa tékniku sei hahú instala iha diresaun nasionál, mais ou menus ultimo eh medium Marsu.

entretantu, Sekretaria Estadu Konsellu Ministru no Komunikasaun Sosiál, Matias Boavida agradese ba Governu Japan nia apoiu no UNDP atu bele tulun CRC ho mobile radio nune’e bele instala no tranzmite informasaun ba komunidade sira iha rurál.

Programa asisténsia eleitorál liuhosi UNDP iha Timor-Leste ne’ebé hetan tulun hosi Governu Japan hodi apoiu ekipamentu rádiu mobile ba CRC, Sekretaria Estadu Konsellu Ministru no Komunikasaun Sosiál.

(Jornalista : Zezito Silva)

(Editór : Manuel Pinto)

HUSIK IDA HATÁN