DILI, (TATOLI) – Tribunál Rekursu, Deolindo dos Santos, hateten nia simu ona pedidu auditória hosi Xefe Governu, Marí Alkatiri, atu halo auditória ba projetu Zona Espesiál Ekonomia Sosiál Merkadu (ZEESM) Oekusi, ne’e duni tribunál sei haree kestaun ne’e.
“Tribunál Rekursu ezerse nia funsaun nu’udar Tribunál Konta sei haree ida ne’e hodi tau iha planu tribunál nian dentru posibilidade ne’ebe tribunál iha”, nia hato’o ba jornalista sira iha Palásiu Prezidente Nicolau Lobato, Bairru Pité, segunda ne’e hafoin soru-mutu ho Prezidente Repúblika, Francisco Guterres Lú Olo.
Nia hatete planu tribunál nian liu-liu Kámara Konta nian ne’e planu anuál katak tinan ida saida maka tribunál atu halo ne’e iha planu kedas. Tanba ne’e, nia esplika Tribunál Rekursu la’o tuir de’it planu anuál ne’ebé iha ona.
Kona-ba enkontru ho Prezidente Repúblika, Deolindo haktuir ko’alia kona-ba preparasaun tribunál nian atu enfrenta eventu eleisaun antesipada.
Nia tenik, lei ne’e atribui kompeténsia balun ba Tribunál Rekursu atau haree parte balun hosi eleisaun ne’e rasik.
“Prezidente Repúblika dekreta ona loron ba eleisaun, entaun ita hein publikasaun Dekretu Prezidensiál iha Jornal Repúblika katak, tuir lei, loron 30 konta hosi publikasaun Dekretu Prezidente Repúblika nian ne’e, fó biban ba partidu sira atu aprezenta lista kandidatura ba Tribunál Rekursu”, esklarese.
Jornalista: Xisto Freitas
Editora: Rita Almeida
