Traballadora Timoroan Iha Perth Fila Ona Mai Timor-Leste

0
424
Deolinda da Costa Fernandes.

DILI, (TATOLI) – Traballadora timoroan ne’ebé hala’o serbisu iha Perth, Austrália, Deolinda da Costa Fernandes, ne’ebé ho kondisaun isin-rua fila ona mai Timor-Leste no rekoñese katak lahalo teste médiku iha klínika Cindranita antes bá Austrália tanba hatene nia kondisaun grávida, maibé laiha ema ida mak fasilita nia atubele hala’o serbisu iha Austrália.

Deolinda hatete nia konsege bá hala’o serbisu iha nasaun viziña ne’e tanba oportunidade mak halo nia bele to’o iha ne’ebá.

“Ha’u tuir teste hotu ona no asina ona kontratu só ida ikus liu atu bá teste iha Cindranita, ha’u la bá tanba kondisaun isin-rua, ha’u tauk ho ida ne’e tanba karik ha’u bá teste entaun ha’u la bá, to’o SEPFOPE (agora SEJT) telefone dehan bá asina entaun bolu ha’u-nia katuas-oan no mana na’in-rua ba asina kontratu to’o ami arranka, maibé laiha ema ida mak atu haruka ha’u bá”, Deolinda hatete ida ne’e hafoin to’o iha aeroportu Nicolau Lobato, ohin.

Antes atu bá Austrália traballadora sira asina dokumentu katak ema ne’ebé ho kondisaun isin-rua labele bá hala’o serbisu. “Ami tuir briefing loron rua, bin no maun sira (staff SEJT) fó hatene so ha’u mak la onestu”.

Traballadora ne’e hatutan bainhira husi parte SEJT mak husu kona-ba teste médiku nian karik nia sei onestu. “Ida ne’e mak sira lahusu, sira lahusu ne’e mak ha’u mós obriga bá de’it, karik sira husu ha’u jujur”.

Sobre kompañia bele hatene traballadora ne’e isin-rua tanba Deolinda rasik fó hatene ba nia xefe ho informa fali ba empregadór, nune’e kontaktu kedan mai Timor-Leste kona-ba kondisaun traballadora nia ne’ebé bele pasa bá hala’o serbisu iha Austrália.

“Sira lahirus maibé sira fó sala fali ba staff sira husi SEJT dehan haruka fali ema ho kondisaun hanesan ne’e mai serbisu iha ne’e (Austrália)”.

Maski hatene kondisaun isin-rua, traballadora ne’e lakohi onestu ba SEJT tanba haree ba oportunidade ne’ebé iha, nune’e aproveita ida ne’e tanba sei laiha tan oportunidade seluk. “Ho hanoin ida ne’e mak ha’u obriga ho kondisaun isin-rua mós ha’u bá duni’.

Depois to’o tiha iha Timor-Leste, Deolinda sente di’ak, maibé triste tanba ba ho ekipa mas fila mesak de’it. Deolinda arranka husi Timor-Leste  iha dezembru 2017 ho kondisaun fulan-haat no to’o fali mai Timór ho isin-rua fulan-lima ho balun.

Jornalista: Maria Auxiliadora

Editora: Rita Almeida

HUSIK IDA HATÁN