Traballadór Indonézia Domina TL Hafoin Xina-Filipina

0
98
Inspetór Jerál Traballu, Sekretáriu Estadu Juventude no Traballu, Aniceto Leto Soro. Foto Tatoli/Egas Cristovão.

DILI, (TATOLI)-Dadus traballadór estranjeiru ne’ebé rejistadu iha Sekretáriu Estadu Juventude no Traballu (SEJT) tuir relatóriu kinzenál (quinzenal-iha portugés) atividade iha 2012-2017 nian hatudu katak Indonézia mak okupa númeru traballadór barak liu iha Timor-Leste, tuirmai mak Xina no Filipina.

Inspetór Jerál Traballu, Aniceto Leto Soro hatete, traballadór Indonézia hamutuk 2.774, Xina iha númeru 1.150, Filipina 667 no nasaun seluk ne’ebé iha númeru ki’ik liu husi país sira ne’e.

“Totál nasaun ne’ebé nia traballadór serbisu iha Timor-Leste ne’e iha 43, entaun iha Estadu hamutuk 43 mak iha ne’e”, Aniceto hatete iha Kaikoli, horisehik.

Enkuantu empregadór ne’ebé fó serbisu barak liu ba ema mak husi Xina ne’ebé iha númeru empregadór rejistadu hamutuk 447.

“Tuirmai Indonézia 264 no Filipina iha 133 empregadór ne’ebé legalmente eziste iha Timor-Leste no tuirmai nasaun seluk tan”.

Empregadór no traballadór ne’ebé alista iha baze dadus SEJT nian ne’e, iha vistu traballu, autorizasaun ba serbisu no kontratu traballu ne’ebé legalizadu.

Kona-bá traballadór ilegál ne’ebé mak hala’o nia serbisu iha país ne’e, Aniceto hatete SEJT servisu hamutuk ho Migrasaun, Ministériu Defeza no Seguransa, Ministériu Negósiu Estranjeiru Kooperasaun para haree legalidade prezensa estranjeiru ne’ebé ilegalmente halo atividade iha Timor-Leste.

“Ita-nia servisu konjutu ne’e hahú iha 2012 dezde entrada em vigor lei traballu. Ita haree katak realidade ema barak sei uza duni vistu turista hodi halo atividade, ne’e ita halo operasaun konjunta kuandu ita kaer, halo deportasaun ou aplika sansaun ba sira”.

(Jornalista : Maria Auxiliadora)

(Editór : Manuel Pinto)

HUSIK IDA HATÁN