TL Iha Ona Rede Inter-bankária Liga Banku Hotu

1
903
Governadór Banku Sentrál Timor-Leste (BSTL), Abraão de Vasconselos. Foto Tatoli/António Gonçalves.

DILI (TATOLI)-Timor-Leste (TL) konta tan ona ho país hitu iha mundu ne’ebé mak iha ligasaun direta entre Governu nia sistema ho pagamentu inter bankária Real Time Groos Settlement (RTGS) ka likidasaun ba valór brutu iha tempu reál.

Tanba tuir publikasaun husi Bank for International Settlement, só país hitu hanesan Brazíl, Fransa, Jamaika, Olanda, Suésia no Suisa mak halo sistema ligasaun direta entre Governu nia sistema no pagamentu inter bankária, maibé ohin Timor-Leste konta tan ho nasaun sira ne’e hodi halo ligasaun direta entre Governu no banku sira iha nasaun ida ne’e liuhusi pagamentu inter ligasaun R-TiMOR ka rede transferénsia iha momentu reál ne’ebé ohin lansa ona.

Governadór Banku Sentrál Timor-Leste (BSTL), Abrão de Vasconcelos, hatete Timor-Leste halo tan istória ne’ebé halo país barak iha mundu mak sei tuur ho Timór nia naran no konta Timor-Leste nia dezenvolvimentu iha área jestaun finansas públika no sistema pagamentu nasionál.

“Tanba ne’e ha’u hakarak hodi Banku Sentrál no komunidade setór finanseiru, liuliu setór bankária nia naran félisita Governu en partikulár Ministériu Planu no Finansas (MPF) ba dezenvolvimentu importante ida ne’e”, katak Abrão iha lansamentu ligasaun sistema GRP ka Free Balance Planeamentu Rekursu Governu ho R-TiMOR iha edifísiu Ministériu Planu no Finansa, ohin.

Integrasaun sistema GRP MPF nian ho sistema R-Timor importante tebes ba dezenvolvimentu sistema pagamentu nasionál nian iha futuru tanba la’ós de’it halo prosesu likidasaun (settlement) iha sistema pagamentu nasionál sai efisiente no efetivu, maibé mós interligasaun ida ne’e sei sai hanesan instrumentu prinsipál hodi transforma Timor-Leste nian ekonomia ida ne’ebé sei cash-based ka baze ho osan.

BSTL iha 2013 hahú inisiativa atu moderniza Timor-Leste nia sistema pagamentu nasionál no iha 2014 dezenvolve estratéjia ida ne’ebé sai matadalan ba partisipante hotu iha sistema finanseira Timor-Leste nia inklui fornesedór serbisu pagamentu atu uza hanesan referénsia bainhira sira halo investimentu ka moderniza sira-nia serbisu ka produtu.

“Estratéjia ida ne’e hatuur vizaun lubuk ida, inklui vizaun ida atu transforma ita-nia sosiedade ne’ebé sei cash-based ba sosiedade ida ne’ebé integradu iha sistema finanseira nia laran ho fasilidade nesesária atu permite sira hala’o tranzasaun hotu-hotu eletrónikamente”.

Estratéjia ne’e inklui programa prinsipál mak introdusaun sistema transferénsia automátika ne’ebé bolu R-TiMOR ne’ebé hahú operasionaliza  iha inísiu 2015 ne’ebé kompostu elementu rua RTGS ne’ebé prosesa tranzasaun sira hanesan TPO iha tempu reál no elementu seluk mak kaza-kompensasaun  automátika ne’ebé fasilita pagamentu en-masa hanesan saláriu ba funsionáriu públiku, idozu, veteranu sira ne’ebé organiza iha sesaun rua loroloron.

“Ha’u informa katak tempu operasaun ka up-time sistema TiMOR atinje porsentu 99.9 dezde inísiu ninia operasaun”.

Integrasaun sistema GRP ho R-TiMOR iha partisipante hitu ne’ebé integra iha Timor-Leste nia sistema transferénsia doméstika no iha banku ida de’it mak seidauk halo koneksaun automátika (online) ho sistema R-TiMOR mak ANZ.

Programa prinsipál seluk mak introdusaun switch nasionál ba kartaun no telemovel ne’ebé agora daudaun prosesu la’o hela. “Programa ne’e sei integra mákina ATM no EFTPOS husi banku sira hotu iha Timor-Leste ne’ebé sei permite kliente sira bele asesu sira-nia konta iha kualkér ATM ida iha territóriu Timór tomak.

“Partisipasaun Ministériu Planu no Finansas nian iha sistema R-TiMOR nu’udar pasu fundamentál ida atu atinje objetivu sira ne’ebé kontempla ona iha Planu Dezenvolvimentu Nasionál. Ita hein katak integrasaun sistema GRP ho R-TiMOR sei mós benefísiu mai ofisiál sira MPF no BSTL en-termu simplifikasaun iha prosesu administrasaun no efisiénsia iha serbisu sira”.

(Jornalista : Maria Auxiliadora)

(Editór : Manuel Pinto)

 

1 COMMENT

HUSIK IDA HATÁN