TL-Austrália Aseita Fronteira Marítima Nu’udar Dalan Ikus Dezenvolve Greater Sunrise

0
380
Foto fanpage Austrália iha Timor-Leste.

DILI, (TATOLI) – Durante reuniaun foin lalais ne’e iha Kuala Lumpur Malázia, Komisaun Konsiliasaun konklui ona akordu tratadu delimitasaun Fronteira Marítima entre Timor-Leste (TL) no Austrália hodi hakat ba pasu atu dezenvolve kampu gás Greater Sunrise.

Tuir nota komunikadu husi Permanent Court of Arbitration (PCA), iha reuniaun sesaun finál ne’ebé realiza kuaze semana ida ne’ebé hahú 19 fevereiru 2018 ne’e, parte rua hetan ona akordu tratadu delimitasaun Fronteira Marítima iha Tasi Timor ne’ebé trata situasaun jurídika kampu gás Greater Sunrise, estabelesimentu rejime Espesiál ida ba Greater Sunrise hanesan dalan atu dezenvolve rekursu.

Alende ne’e, tratadu sei estabelese arranju hodi fahe reseita entre Governu TL no Austrália, ho montante reseita ne’ebé aloka ona ba kada parte sei hetan lahanesan, depende ba konseitu dezenvolvimentu.

Nune’e atu konklui prosedimentu hirak ne’e, iha loron 6 Marsu 2018 tuku lima loraik oras lokál, governu TL no Austrália sei iha enkontru iha Nova Iorke atu asina tratadu foun Fronteira Marítima.

Sekretáriu Jerál Nasoens Unidas, António Guterres, sei sai sasin ba seremónia asinatura tratadu ne’ebé sei realiza iha kuartel jeneral Nasoens Unidas ho konjuntu husi Prezidente Komisaun Konsiliasaun, Embaixadór Peter Taksøe Jensen.

Komisaun Konsiliasaun agora sei finaliza ninia relatóriu konaba prosesu ne’ebé tenke depozitadu ho Sekretáriu Jerál Nasoens Unidas iha termu aneksu V konvensaun no relatóriu ne’e sei publika iha fulan Abril tinan ne’e nia laran.

Antes ne’e, bazeia ba planu asaun husi rezultadu akordu Pakote Abrangente loron 30 Agostu 2017 entre TL no Austrália, Komisaun Konsiliasaun aprezenta ninia konkluzaun ba governu nasaun rua ne’e ho objektivu atu fornese subsídiu atu hetan desizaun konaba dezenvolvimentu rekursu.

Entretantu ho disputa ne’ebé naruk, propriutáriu Greater Sunrise Woodside Petroleum, ConocoPhillips, Royal Dutch Shell no Osaka Gás Japaun deside atu arkiva projeitu ne’ebé ho estimasaun US$ 50 billaun ne’e.

Iha tinan 2017, Austrália konkorda atu aseita notifikasaun formal husi TL atu hetan akordu ida fahe reseita mina ne’ebé hanesan husi Greater Sunrise no estabelese kronograma ho durasaun tempu tinan 50 atu negosia Fronteira Marítima permanente maibé parte TL lori disputa naruk ne’e ba PCA ne’ebé hanesan organizasaun intergovermental ho sede iha Haia atu ordena arbitramentu obrigatóriu entre parte rua.

Nune’e, iha tinan kotuk Tribunal ne’e anunsia katak parte rua hetan ona akordu elementu sentral delimitasaun Fronteira Marítima entre sira ho Tasi Timor maibé detalhu ne’e sei konfidensial to’o finaliza akordu ne’e.

História Tratadu Iha Tasi Timor

Iha tinan 1989, bainhira TL sei iha okupasaun Indonézia, Austrália no Indonézia asina tratadu Timor Gap. Hafoin Indonézia husik TL ho akordu ne’ebé la’os permanente, Indonézia ho Austrália fahe rekursu Timor Gap.

Iha tinan 2002, bainhira TL hetan ona independénsia, tratadu Tasi Timor asina ho akordu la’os permanente Fronteira Marítima. Nune’e, iha tinan 2004, TL hahú halo negosiasaun fali ho Austrália konaba asuntu ne’e no ikus mai, tinan 2006 TL no Austrália asina akordu Treaty on Certain Maritime Arrangements in the Timor Sea (CMATS) maibé la’os akordu permanente no parte rua deside reseita kampu mina no gás Greater Sunrise sei fahe uniformemente entre nasaun rua ne’e.

Jornalista: Julia Chatarina

HUSIK IDA HATÁN