Timor-Leste Seidauk Iha Lei Protesaun Sítiu Istóriku

0
159
Foto GPM.

DILI (TATOLI) – Timor-Leste ladauk iha lei atu fó protesaun ba sítiu (fatin) istóriku sira, nune’e governu liuhosi ministériu kompetente presiza tau atensaun, bainhira ko’alia kona-ba prezervasaun istoria.

“Enkuadramentu legál mak ita presiza hodi fó protesaun ba sítiu istóriku sira. Ita to’o agora seidauk iha lei ne’ebé mak ko’alia  kona-ba prezervasaun sítiu istóriku, oinsá mak atu halo reabilitasaun no halo restaurasaun ba sítiu istóriku hirak ne’e,” Diretór Ezekutivu Sentru Nasionál Chega, Hugo Fernandes nia intervensaun molok atu lansa mapamentu sítiu istória iha Balidi, Segunda (5/02).

Ho lei protesaun sítiu istóriku ne’e, Sentru Nasionál Chega elabora ona nota konseitu, nune’e iha semana oin asesór jurídiku hosi Ministériu Turizmu, Edukasaun, Estatál, Obras Publicas hodi tuur hamutuk atu haree enkuadramentu legál.

Biar nune’e, Sentru Nasionál Chega Ezekuta ona mandatu hodi halo mapamentu ba sítiu istóriku, nune’e relatóriu Chega identifika sítiu istóriku iha Dili laran hamutuk 50 resin.

Fatin istóriku konsideradu hanesan fatin detensaun, fatin interrogasaun, prizaun inklui postu militár, fatin violasaun direitu umanu sira akontese, fatin ne’ebé hatudu jestu ativizmu,  fatin demonstrasaun, fatin abrigu, fatin rezisténsia, fatin klandestina no fatin diplomátika.

Sítiu istóriku hirak ne’e identifikadu ona liliu iha Munisípiu Dili, Atauru no Manatutu.

Entretantu, Sentru Nasionál Chega mós introdús inisiativa atu elabora istori pesoál tanba Komisaun Akollementu Verdade no Rekonsiliasaun (CAVR-Sigla Portugués) rekomenda ona ba Ministériu Edukasaun atu iha posibilidade fó tulun ba luta na’in sira atu hakerek sira nia memória kona-ba sira nia envolvimentu luta libertasaun nasionál, tanba luta na’in sira balun hakerek ona nia istória no balun mate ona no la konsege hakerek nia istória.

Nune’e mós, tranzmisaun memória jérasionál importante tanba jerasaun foun sira hakerek istória inan aman sira ne’ebé involve iha luta libertasaun.

“Oinsá involve jerasaun foun sira? ami introdús istória pesoál liuhosi tranzmisaun memória jérasionál, ideia ne’e ba Ministériu Edukasaun no hela prosesu elaborasaun nu’udar parte ida hosi estra kurrikulár ba estudante sira,” Nia dehan.

Estudante sira sei fila ba uma no entrevista sira nia inan aman no maun alin sira atu dokumenta hafoin haruka mai iha Sentru Nasionál Chega no ita sei kompila fila fali liuhosi eventu sira hafoin ita halo peskiza kle’an liu tan.

Dokumentasaun importante atu foin sa’e sira rona diretamente hosi inan aman sira ne’ebé kontribui ba luta libertasaun nasionál.

Iha parte seluk nia aumenta katak prezervasaun memória pasadu, iha Sentru Nasionál Chega hamutuk  20.000 arkivu dokumentasaun. Hahú rekolla bainhira sentru Nasionál Chega nia funsionamentu iha VI Governu Konstitusionál ne’ebé lidera hosi Primeiru Ministru, Rui Maria de Araujo.

(Jornalista : Zezito Silva)

(Editór : Manuel Pinto)

HUSIK IDA HATÁN