iklan

INTERNASIONÁL

Timor-Leste ho Indonézia Sei Hadi’a Ponte Mota Ain

Timor-Leste ho Indonézia Sei Hadi’a Ponte Mota Ain

Konferénsia imprensa entre governante Timor-Leste no Indonézia. Foto: Kemlu TV

DILI, (TATOLI) – Governu Timor-Leste no Indonézia sei hadi’a ponte Mota Ain ne’ebé kondisaun la di’ak, nune’e fasilita atividade ekonómika nomós mobilidade sidadaun rai rua nian.

Ministru Negósiu Estranjeiru no Kooperasaun, Aurélio Guterres, haktuir depois enkontru ho Ministra Negósiu Estranjeiru Indonézia, Retno Marsudi, iha Jakarta; Indonézia promete no prontu ona atu finansia no hadi’a.

Entaun follow up (atualiza) husi ne’e, MNEK to’o mai fó hatene ba Ministériu Obra Públika liu-liu vise-ministru, Inácio Morreira ho nia ekipa.

“Husi parte ne’ebá iha ona ekipa ida, ekipa ida ne’e hein hela dokumentu ne’ebé akordu husi rai rua presiza atu asina para oinsá implementa”, informa Aurélio ba jornalista sira iha MNEK, Praia dos Coqueiros, kuarta (6/2).

Ministru Aurélio Guterres relata horiseik iha ona enkontru tékniku ida iha Obra Públika i depois ohin (kuarta) tuir loloos atu enkontru tan dala ida atu deskute dokumentu ne’e.

“Soké dokumentu ne’e seidauk distribui ba Obra Públika nomós Ministériu Negósiu Estranjeiru rasik mós seidauk hetan dokumentu ne’e sira haree tiha lai mak depois enkontru fali iha loron hirak mai ne’e nia laran”, haktuir governante ne’e.

Projetu ne’e tuir Indonézia nia planu iha abril hahú rekonstrusaun. Sira mak finansia hotu, ita só haree, fó apoiu, tan iha loos mota klaran, parte balun husi Indonézia, parte balun husi Timor-Leste.

Presiza haree husi aspetu legál oinsá? no aspetu tékniku oinsá? Ne’e mak ita-nia Ministériu Obras Públika atravéz vise-ministru ho nia ekipa rasik.

“Husi Ministériu Negósiu Estranjeiru haree husi aspetu legál, pois bele asina, bele hahú ona halo projetu”, akresenta.

Hela Pursentu Tolu

Kona-ba fronteira terestre iha área Naktuka, prosesu negosiasaun atu halo delimitasaun hela de’it ona pursentu tolu atu kumpleta.

“Rezultadu enkontru ho Ministra Negósiu Estranjeiru Indonézia, konkorda ona katak agora husi parte rua, MNEK ita nian rasik, sei prepara planu ida para finaliza tinan ne’e”, katak.

Nia haktuir Indonézia dehan tinan ne’e finaliza kedas fronteira terestre. Bainhira finaliza, espera fronteira tasi nian ho Austrália nian loos ona, entaun ita ho Indonézia diskute fali fronteira tasi.

“Ho Indonézia ita tau kedas ona tempu, foin dadauk ha’u enkontru ho diretór jerál asuntu bilaterál ho diretór nasionál toma konta asuntu fronteira nian”, dehan governante ne’e. Hodi hatutan: “Husi ita-nia parte, sira prepara ona planu ida para hatama ba Indonézia para konkorda para nune’e ita bele finaliza fronteira terestre iha tinan ida ne’e kedas”, konklui.

 Jornalista: Rafy Belo

Editora: Rita Almeida

iklan
iklan

Leave a Reply

iklan
error: Content is protected !!