iklan

INTERNASIONÁL

Timor-Leste Agredese Apoiu Singapura

Timor-Leste Agredese Apoiu Singapura

Ministru Aurélio Guterres ho nia omólogu Vivian Balakrishnan. Foto: MNEK

DILI, (TATOLI) – Timor-Leste liuhusi Ministériu Negósiu Estranjeiru no Kooperasaun (MNEK), Aurelio Guterres agradese apoiu Singapura, hahú husi tempu restaurasaun indepedénsia to’o ohin loron.

Apoiu ne’ebé Singapura fó ba Timor-Leste mak programa kapasitasaun rekursu umanu, liu-liu treinamentu ba funsionáriu públiku iha área oi-oin.

Timor-Leste hato’o agradesimentu iha okaziaun bainhira Ministru Aurélio Guteres halo vizita traballu loron rua, 28 to’o 30 janeiru hodi hasoru malu ho nia omólogu, Vivian Balakrishnan hodi ko’alia asuntu bilaterál nian no reforsa relasaun entre país rua.

Tuir komunikadu MNEK ba ajénsia TATOLI, ohin katak iha sorumutu entre governante husi rai rua ne’e nian ko’alia mós oinsá atu  hametin relasaun iha área ekonomia no komérsiu no iha mós konkordánsia atu halo konferénsia ida iha Singapura iha tempu badak.

Eventu ne’e sei envolve emprezáriu no investór Singapura sira atu esplora posibilidade hodi halo investimentu iha Timor-Leste.

Ministru Aurélio Guterres durante iha enkontru espresa determinasaun Timor-Leste atu sai membru ba Asosiasaun Nasaun Sudeste Aziátiku (ASEAN-Association of South East Asean Nation) ba Singapura ne’ebé oras ne’e dadaun nu’udar prezidente rotativu organizasaun aziátika ne’e. Governu Singapura promete atu kontinua apoiu governu Timor-Leste iha área hotu ne’ebé presiza.

Durante vizita traballu loron rua iha Singapura, Ministru Negósiu Estranjeiru no Kooperasaun, Aurélio Guterres iha mós okaziaun hasoru malu kortezia ho Primeiru-ministru Singapura, Lee Hsein Loong.

Iha vizita sira ne’e, governante Aurélio Guterres akompaña husi embaixadór José Trindade de Camões, Diretór Jerál ba Asuntu ASEAN no Enkaregadu Negósiu Embaixada Timor-Leste iha Singapura, Licínio Branco no komitiva.

Entretantu tuir informasaun, Ministru Aurélio Guterres fila fali mai Timor-Leste ohin, hafoin vizita traballu ba Singapura nomós Indonézia.

Jornalista: Rafy Belo

iklan
iklan

Leave a Reply

iklan
error: Content is protected !!