iklan

NASIONÁL, POLÍTIKA

Situasaun Obriga Maubocy-Vitor Fila Hikas Ba FRETILIN

Situasaun Obriga Maubocy-Vitor Fila Hikas Ba FRETILIN

DILI (TATOLI)–Fundador sira partidu Frenti-Mudança hanesan Vitor da Costa, Vicente Maubocy no militante atus rua deklara fila hikas ba FRETILIN, kuarta horsehik iha sede Komité Sentrál FRETILIN, Fatuhada, Comoro, Dili, tanba situasaun mak obriga.

Lider Frenti-Mudança, Vitor da Costa esplika katak sira la’ós halo afiliasaun maibé fila hikas ba knua rasik tanba sira ema FRETILIN.

“Situasaun maka obriga ami hodi hasees hosi FRETILIN durante tinan sanulu resin (2006-2018) maibé la signifika ami sai hosi FRETILIN,” Vitor deklara perante Sekretáriu Jerál FRETILIN, Mari Alkatiri ho adjuntu sekretáriu jerál sira.

Nia haktuir, iha tinan 2006, bainhira sira harii Grupu Renovadór FRETILIN, sira halo kedas rezolusaun ida katak sedu ka tarde sira sei fila fali ba FRETILIN.

 Vitor hatutan, FRETILIN de’it maka iha programa di’ak hodi kore povu hosi kiak no mukit tuir prinsípiu FRETILIN katak libertasaun povu.

Nia afirma, agora ba oin, sira la pertense ona ba Frenti-Mudança maibé  pertense hikas ba FRETILIN atu halo serbisu ba FRETILIN para manan eleisaun antesipada hodi hadi’a povu nia moris.

Iha biban ne’e, lider Frenti-Mudança hirak ne’e ho nia apoliante sira rejistu an hikas kedas nu’udar militante FRETILIN.

Entretantu, Sekretáriu Jerál FRETILIN, Mari Alkatiri hateten maske tasi no mota haketak malu maibé tempu udan sei halai hamutuk. Katak, maske sira durante ne’e haketak malu maibé tempu ona atu hamutuk hikas hodi konkretiza prinsípiu libertasaun povu.

(Jornalista: Xisto Freitas)

(Editór : Manuel Pinto)

iklan
iklan

Leave a Reply

iklan
error: Content is protected !!