Interligasaun Sistema R-Timor Simplifika Fluksu Servisu

0
254
Ministru Planu no Finansa, Rui Augusto Gomes. Foto/Egas Cristovão.

DILI (TATOLI) –Ministru Planu no Finansa, Rui Gomes esplika interligasaun sistema R-Timor hosi Banku Sentrál Timor-Leste (BSTL) no GRP (Government Resource Planning) hosi governu nia benefísiu mak simplifika fluksu servisu.

“Benefísiu Estadu uza sistema automatizadu ne’e barak tebes hanesan simplifika fluksu servisu nian no ilumina intervensaun umanu, efisiénsia iha prosesu pagamentu ne’ebé seguru no kredivel no bainhira erru ruma hanesan hakerek konta bankária ba benefisiáriu ruma, bele deteta kedas no kurisi erru ne’e molok atu halo pagamentu,” Rui Gomes esplika iha nia intervensaun iha lansamentu sistema R-Timor ho GRP, horisehik.

Alende ne’e, benefísiu seluk mak servisu ho real time (tempu reál), tezouru no entidade estadu tomak bele monitoriza balansu hodi bele halo jestaun di’ak liu ho likidés, nune’e mós halais ezekusaun orsamentál no movimentu orsamentu iha rai laran no bele mós estimula kreximentu ekonomia.

Enkuantu benefísiu ba sosiedade mak hanesan bele habelar liu tan setór finanseiru ba segmentu sosiedade sira ne’ebé sidauk hetan servisu bankáriu (inkluzaun finanseira).

Biar nune’e nia fó hanoin, sistema sira bele di’ak, maibé ezije mós rekerimentu iha liña koneksaun (internet) no eletrisidade hodi bele suporta ba servisu ne’e.

GRP hanesan sistema ne’ebé Governu uza durante ne’e liuhosi Ministériu Planu no Finansa (MPF) atu halo jestaun finanseira hodi apoiu prosesu transferénsia orsamentu ba programa Governu hanesan idozu, bolsa da mãe, bolsu estudu, veteranu no seluk tan.

R-Timor, BSTL uza sistema refere hahú tinan 2015 no banku nasionál hanesan BNCTL, BNU no BRI iha ona ligasaun ba sistema ne’e. Agora banku MANDIRI iha koneksaun bainhira nia haruka, signifika kuandu transferénsia husi kliente bank mandiri sai ba banku BNCTL akontese iha tempu reál maibé transferénsia li’ur mai iha kliente bank MANDIRI nian tenke iha intervensaun umana. Banku ANZ mak sidauk iha ligasaun ba sistema ne’e.

Sistema R-Timor kompostu husi elementu prinsipál likidasaun ba valor brutu iha tempu reál (RTGSReal Time Gross Settlement) ne’ebé hanesan elementu ida bele fasilita tranzasaun iha momentu real no kaza kompensasaun automátika hanesan pagamentu ba benefisiáriu no valor pagamentu laiha limitasaun iha tempu hanesan.

Konaba seguransa ba sistema R-Timor, hanesan rede privadu ida ne’ebé iha koneksaun de’it ho partisipante banku sira no Ministériu Planu no Finansa, la’ós hanesan sistema aberta ne’ebé ema bele hare no tenta atu penetra, tanba seguransa ba sistema ne’e rigorozu. Aleinde ida ne’e molok lansa BSTL mós halo ona teste penetrasaun ba sistema.

(Jornalista: Julia Chatarina)

(Editór : Manuel Pinto)

HUSIK IDA HATÁN