Setór Privadu Nia Kontribuisaun Prinsipál Dezenvolve Turizmu

0
42
Diretór Jerál MT, José Dias Quintas. Foto Tatoli/Egas Cristovão.

DILI (TATOLI)—Diretór Jerál MT, José Dias Quintas hatete, bainhira ko’alia kona-ba indústria turizmu maka indústria ida ne’ebé boot no la’ós Governu mesak bele hala’o tanba Governu halo polítika, maibé atu dezenvolve turizmu ne’e bá oin prinsipálmente maka kontribuisaun husi setór privadu nian.

“Tanba indústria atu bá oin, setór privadu nia papél importante tebes oinsá haree ba atendimentu, halo pakote viajen ba turista sira para dada turista sira mai nó mós sai parseiru Governu atu haree ba aspetu promosaun nian”, José hatete iha faze diseminasaun polítika turizmu iha Sentru Konvensaun Dili, ohin.

Nia dehan, hanesan nasaun ida ne’ebé joven, Timor-Leste nu’udar destinu turístiku ida foun ba ema tanba mundu tomak seidauk koñese, nune’e papél importante ba entidade hotu mak divulga no promove fatin turístiku ida foun iha rejiaun Ázia no Pasífiku nian.

Ho ida ne’e, Ministériu Turizmu (MT) dezmina ona Polítika Nasionál Turizmu Timor-Leste nian ba parseiru dezenvolvimentu, setór privadu, akademista, Organizasaun Naun Governamentál (ONG), sosiedade sivíl atubele akompaña polítika turizmu ida ne’e.

Iha prosesu estabelesimentu Polítika Nasionál Turizmu liuhusi faze ida naruk mak konstrusaun, semináriu, publikasaun online para husu rekomendasaun entidade tomak tanba turizmu ne’e la’ós MT nian de’it, maibé ema hotu nian, nune’e presiza parte interesandu sira-nia kontribuisaun ba dezenvolvimentu turizmu nian.

Prosesu desiminasaun informasaun liuhosi konferénsia internasionál ida oinsá matenek na’in sira fó sira-nia opiniaun no ikus liu mak polítika ne’e MT manda ba Madrid tanba Timor-Leste mós membru ba Organizasaun Mundiál Turizmu (tama iha 2005) para sira halo revizasaun ba polítika ne’e.

Nune’e iha ona faze halo diseminasaun para hotu-hotu bele hatene vizaun turizmu to’o 2030 oinsá atu atinje no setór privadu iha papél importante tanba indústria atu la’o bá oin, sira mak sai mákina hodi halo parseria ho Governu no komunidade atu lori dezenvolvimentu ne’e bá oin.

Bazeia ba dekretu lei númeru 24/2016 hatete atu dezenvolve turizmu tenke iha polítika nasionál ida no iha ne’e presiza identifika zona estratéjika ne’ebé iha planu estratéjika 2011-2030 mak leste, oeste no sentrál. Atu dezenvolve zona sira ne’e maka presiza iha planu estratéjiku ida para implementa polítika ne’e ba iha prátika.

Polítika Nasionál Turizmu konstitui kompromisu Governu Timor-Leste iha sentidu dezenvolvimentu setór turístiku unifikadu no olístiku, ho énfaze iha sustentabilidade, komunidade, kualidade no kompetitividade empreza sira.

Vizaun turizmu até 2030 mak Timor-Leste iha setór turístiku vibrante no atrativu, ne’ebé kontribui signifikativamente ba empregu iha país tomak, hanesan ekonomia, sosiál no ambientál sustentavel, ajuda hodi promove imajen pozitiva Timor-Leste ba li’ur, no sai fatin indústria ida ne’ebé ema hotu hakarak serbisu.

Objetivu prinsipál mínimu iha Polítika Nasionál Turizmu to’o 2030 mak reseita turizmu esteriór, eskluindu reseita operadora (tarifa aériu no taxa ferry), sai millaun 150 kada tinan (presu iha 2016, ou presu ajustadu iha funsaun inflasaun entre agora no 2030). Empregu iha turizmu aumenta ba 15,000 (atualmente iha serkade 4,300 tuir estimativa ho baze iha 2014 Business Activities Servey nian) no viajante internasionál 200.000 sei to’o iha Timor-Leste anualmente, ho estadia loron haat, iha média.

Polítika Nasionál kona-ba Turizmu Timor-Leste nian ne’e hetan aprovasaun husi Konsellu Ministru iha loron 7 Marsu 2017 ne’ebé ninia baze mak objetivu hirak ne’ebé estabelese tiha ona iha Planu Estratéjiku Dezenvolvimentu – 2011-2030, no ne’ebé hamosu Matadalan ba Reforma no Fomentu Ekonómiku Timor-Leste tinan 2015-2017, dokumentu estratéjiku ida husi Governu konstitusionál VI atu aumenta investimentu privadu, empregu sustentavel no diversifikasaun ekonómika. Iha matadalan ne’e turizmu sai hanesan pilár fundamentál ida husi pillar fundamentál lima husi fomentu ekonómiku iha Timor-Leste.

Polítika Nasionál Turizmu nian identifika nesesidade no difikuldade prinsipál sira ba dezenvolvimentu setór ne’e nian no hatudu alternativa no objetivu sira, atubele alkansa valór no kualidade aas iha nasaun ne’e.

(Jornalista : Maria Auxiliadora)

(Editór : Manuel Pinto)

HUSIK IDA HATÁN