Sétimu Governu La’ós Gasta De’it Maibé Buka Osan

0
297
Ministru Rekursu Minerais, Mariano Sabino Assanami, simu tara tais hosi komunidade Manatuto, molok konsulta Programa Sétimu Governu Konstitusionál ba autoridade munisípiu, autoridade lokál, veteranu sira, reprezentante Igreja Katólika no komunidade sira iha salaun Parókia Santo António Manatuto, sesta (16/2). Imajen Ajénsia Tatoli/Xisto Freitas).

MANATUTU, (TATOLI) – Ministru Rekursu Minerais, Mariano Sabino Assanami, hateten Sétimu Governu Konstitusionál  la’ós gasta de’it osan maibé buka osan liuhusi difiversikasaun ekonomia.

“Ita hakarak buka osan hosi fatin ne’ebé de’it, ida maka setór agrikultura no setór turizmu”, dehan Assanami liuhusi aprezentasaun programa Sétimu Governu Konstitusionál ba autoridade munisípiu, autoridade lokál, veteranu, reprezentante Igreja Katólika no komunidade sira hosi Munisípiu Manatutu ne’ebé hala’o iha salaun Parókia Santu António Manatutu, sesta (16/2).

Setór agrikultura, nia esplika presiza fundamenta liu-tán prosesu para agrikultura ne’e bele forte hodi atinje soberania ai-han.

Tuir nia setór agrikultura ne’e presiza hadi’a buat tolu importante maka rai, bee no loron matan. “Loron matan no rai ne’e ita iha ona maibé durante ne’e ita la akapta bee ka laiha barajen ne’ebé satan bee”, esklarese.

Assanami hatutan Governu ida ne’e ho programa prioridade ba bee (bee ba ema, ba ai-horis, ba animál no bee ba ambiente).

“Durante ne’e jestaun ba bee seidauk la’o. Ema barak mate tanba hemu bee kahor. Animál barak mate la’ós tanba moras maka mai kona de’it maibé tanba la hemu bee”, afirma.

Setór turizmu, nia tenik Governu sei dezenvolve turizmu iha fatin hotu-hotu nune’e bele hatama reseita ba Estadu. Tanba Nasaun barak dezenvolvidu tanba kontribuisaun maka’as hosi setór turizmu.

“Ita nia Nasaun poténsia boot ba turizmu maibé durante ne’e ita la fó importansia hodi dezenvolve. Governu ida ne’e mai atu responde ida ne’e duni”, katak tan.

Jornalista: Xisto Freitas

Editora: Rita Almeida

HUSIK IDA HATÁN