Sesta, Rejistu Estudante Foun UNTL Taka

1
135

DILI, (TATOLI) – Pro-reitór Asuntu Akadémiku, Universidade Nasionál Timor Lorosa’e (UNTL), Marcos António Amaral, hatete universidade sei taka rejistu ba estudante foun sira iha sesta semana ne’e.

“Númeru totál ne’ebé mai universidade ne’e dalaruma bele reduz maibé ami sei hein nafatin to’o sesta. Se sira la mai ona, taka iha sesta, depois iha 13, 14, 15 semana oin, orientasaun akadémika depois ba ensinu aprendijazen”, informa pro-reitór ba mídia komunikasaun sosiál sira iha kampus, ohin.

Tuir nia totál númeru ne’ebé mak mai dalaruma menus, tinan-tinan sempre akontese. Mellor estudante sira ne’ebé mai UNTL, dalaruma hetan oportunidade ba li’ur ona ou bolsu estudu sira ba fali li’ur.

Nia haktuir orientasaun akadémika, tuir planu no Konsellu Xefia universidade nian atu hala’o iha loron 7, 8 no 9 fevereiru maibé tanba sei hein estudante sira balun liu-liu estudante foun, sei fó nafatin tempu to’o sesta semana ne’e. Sira mai hotu mak hahú orientasaun.

“Tanba ne’e orientasaun ami muda fali ba 13, 14 no 15 ba orientasaun akadémiku”, katak Marcos António Amaral.

Orientasaun akadémiku ne’e nia konsentrasaun mak ba estudante sira ne’ebé mai iha UNTL. Ba programa ne’ebé kooperasaun ho Ministériu Edukasaun no INFORDEPE (Instituto Nacional de Formação de Docentes e Profissionais da Educação) ba sira ne’ebé hala’o baxarlatu ema nain 2946 hala’o iha munisípiu, tanba sira ne’e profesór sira atu eleva sira-nia kualifikasaun baxarlatu.

Programa trilaterál entre UNTL liuhusi Fakuldade Edukasaun, Arte no Umanidade ho Ministériu Edukasaun no Kultura (MEK) no INFORDEPE.

“Sira ne’e lansamentu hahú ona, orientasaun hala’o ona, sira-nia prosesu la’o ona. Sira ne’ebé atu hala’o orientasaun iha 13, 14 no 15 fevereiru ne’e, ida ne’ebé mak tama iha UNTL ne’e”, reforsa.

Planu, universidade sempre buka melloria ninia kualidade, ninia kondisaun liuhusi kritéria eh rekizitu hotu-hotu iha universidade ninian i tuir vagas, tuir númeru ne’ebé mak hato’o husi departamentu ida-idak, husi fakuldade ida-idak. Ida ne’e mak tinan-tinan universidade hala’o.

“Deserteza barak mak aplika maibé nafatin tuir kritériu ne’ebé mak estabelesidu husi Ministériu Edukasaun ho universidade. Tanba ne’e, ekipa konjunta mak hala’o ne’e”, haktuir.

Konfirmadu husi ajénsia TATOLI ba mídia UNTL, informa reitór Francisco Miguel Martins fó sai orientasaun akadémiku ba tinan létivu 2018, muda fila fali ba loron 15 to’o 17.

“Ha’u fó ona orientasaun atu komisaun sira hala’o ho sistema ne’ebé edukativu, la iha tan hanesan uluk tempu Indonézia nian, tanba ita korije ona tinan barak, atu hatudu buat ruma ne’ebé mak estudante sira presiza hatene”, salienta.

Fakuldade sira iha UNTL mak Fakuldade Agrikultura, Fakuldade Siénsia Ezata, Fakuldade Siénsia Sosiál, Fakuldade Direitu, Fakuldade Ekonomia no Jestaun, Fakuldade Edukasaun, Arte no Umanidade, Fakuldade Enjeñária, Siénsia no Tekonolojia, Fakuldade Filozofia, Fakuldade Medisina no Siénsia Saúde.

Jornalista: Rafy Belo

Editora: Rita Almeida

1 COMMENT

HUSIK IDA HATÁN