Semana-Oin Setór Hotu Sei Hetan Audit

0
301
Primeiru-Ministru, Marí Alkatiri.

AILEU (TATOLI)–Primeiru-Ministru, Marí Alkatiri fó sai ona katak iha semana oin ne’e ekipa auditoria ne’ebé mak governu kontratu ona hamutuk ho Tribunál de Contas halo auditoria ba setór oin-oin. Auditoria ne’e sei hahú uluk iha Rejiaun Administrativa Espesiál Oekusi Ambenu (RAEOA).

Mari Alkatiri dehan, Governu ne’ebé mak nia lidera hakarak iha justisa sosial no justisa ekonomia ba povu, tanba ne’e audit sei halo ba tezouru, setór infraestrutura, setór turizmu no seluk tan.

“Semana oin sei kontrata empreza balun ho Tribunal de Contas para hahú halo auditoria no auditoria sei hahú uluk iha Oekusi,” Mari Bin Amude Alkatiri fó sai iha diálogu ho entidade hotu iha Salaun Timor Klaran Aileu, horisehik.

Objetivu hosi audit ne’e mós tanba hakarak atu buka hatene osan ne’ebé durante ne’e gasta ona.

“Ema balun lakohi FRETILIN ukun para atu hatene osan sira durante ne’e ba para iha ne’ebé, tanba Governu dahituk hakarak atu buka hatene osan sira ne’e ba para iha ne’ebé, ida ne’e mak hotu-hotu halai hamutuk kontra Governu,” Alkatiri argumenta.

Entretantu Investimentu ba mega projetu hanesan projetu tasi mane (Suai Suplay base, Refinaria Betano no LNG – Beaço, Viqueque), ZEEMS Oe-Cusse no Porto Tibar nu’udar alternativa atu asegura sustentabilidade ekonomia no oinsá atu estadu bele Kore-an husi dependénsia despeza estadu nian iha orsamentu jerál do estadu tinan-tinan ba fundu mina rai.

Enkuantu Fundu infraestrutura hodi halo no hadi’a estrada no pontes sira, bee-mós no sanitasaun, hadi’a no hari eskolas sira, hadi’a no hari ospitais sira hari sentrál elétrika no seluk tan ho objetivu atu oferese asesu públiku no mós kria kondisaun mínimu hodi atrai investimentu ekonómiku.

Fundu dezenvolvimentu capital humano nu’udar polítika ba formasaun no kapasitasaun hodi  bele prodúz rekursus ne’ebé kualifikadu atu bele asegura sustentabilidade governasaun nian hodi Kore-an husi dependénsia ba assesores.

(Jornalista: Julia Chatarina)

(Editór : Manuel Pinto)

HUSIK IDA HATÁN