Semana Kotuk, Númeru Asidente iha 31 no Insidente 40

0
70
Komandante Jerál Polísia Nasionál Timor-Leste (PNTL), Komisáriu Júlio da Costa Hornay, informa ba jornalista sira kona-ba kazu krime ne'ebé akontese hafoin enkontru ho Prezidente Repúblika iha Palásiu Prezidente, ohin. Foto Tatoli/Xisto Freitas

DILI, (TATOLI) – Komandante Jerál Polísia Nasionál Timor-Leste (PNTL), Komisáriu Júlio da Costa Hornay, hateten asidente ne’ebé akontese iha semana kotuk hamutuk 31 no insidente hamutuk 40.
Nia esplika asidente ne’e akontese tanba ema lakohi kuida ninia saúde liu-liu hemu tua lanu depois lori kareta ka motor.

“Ita sempre apela katak bainhira kondus transporte tenke ho kondisaun ne’ebé maka di’ak. Labele hemu tua. Kuandu lanu di’ak liu deskansa”, Hornay hato’o ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin levanta kazu hirak ne’e ba Prezidente Repúblika, Francisco Guterres Lú Olo.

Insidente ne’e, nia haktuir kona-ba baku malu (ofensa integridade fízika simples) entre joven ho joven ne’ebe nia kauza mai hosi hemu tua lanu, violénsia domestika (feen ho la’en baku malu).

Númeru kazu hirak ne’e, nia dehan na’in ida mate no sira seluk hetan kanek no salienta katak kazu sira ne’e akontese iha Dili nomós iha munisipiu.

Medida prevensaun ba akontesementu hirak ne’e, Komandante Jerál afirma oras ne’e PNTL halo pasa revista (check point), kontrola no tama iha suku no aldeia hodi fo hatene ba komunidade liu-liu joven sira atu hasees án hosi krime ka asidente no insidente sira.

Jornalista: Xisto Freitas

Editora: Rita Almeida

HUSIK IDA HATÁN