DILI, (TATOLI) – Prezidente Konsellu Administrasaun Radiu Televizaun Timor-Leste, Emprensa Públika (RTTL, E.P), Gil da Costa, hatete RTTL iha dever atu haree lalaok governu nian fó benefisiu ba povu ka la’e, se membru governu ruma la tuir dalan loos, RTTL labele taka matan de’it.
“Iha rai ida ne’ebé Korupsaun, Koluzaun no Nepotizmu (KKN) buras sei impede objetivu Estadu nian hanesan define iha artigu 6 konstituisaun RDTL (objetivu Estadu nian). Entidade hothotu tenke fó liman ba malu atu valoriza kna’ar jurnalista sira nian iha fatfatin”, hatete iha ninia diskursu bainhira simu pose iha Palásiu Governu, ohin.
Artigu 6 (Objectivu Estadu nian) Estadu nia objetivu fundamentál sira maka: a) Defende no garante nasaun nia soberania; b) Garante no promove sidadaun sira-nia direitu no liberdade fundamentál, no respeitu ba Estadu nia prinsípiu kona-ba direitu demokrátiku; c) Defende no garante demokrasia polítika no partisipasaun populasaun nian kona-ba rezolusaun problema nasionál sira.
Nune’e mós alinea d) Garante dezenvolvimentu ba ekonomia, ba progresu siénsia no téknika; e) Harii sosiedade ida-ne’ebé hatuur iha justisa sosiál, hodi hakiak sidadaun sira-nia moris di’ak ba isin no ba klamar; f) Proteje didi’ak meiu-ambiente no boli nafatin riku-soin rai nian; g) Hakatak no haloko povu timoroan nia personalidade no nia liman-rohan kulturál. h) Harii no haburas relasaun di’ak no harosan (kooperasaun) ho povu no ho estadu hotuhotu; i) Promove dezenvolvimentu ida-ne’ebé nakait kabeer ba setór oioin no rejiaun sira, no mós fahe loloos produtu nasionál nian; j) Hamoris, promove no garante biban no leet ne’ebé hanesan ba ema feto no mane.
RTTL sei promove TL ho objetivu dezenvolve Nasaun ho misaun mak “Haburas Unidade ho Integridade, Promove Demokrasia, Haburas Dezenvolvimentu atu Garante Integridade Nasionál”.
“Demokrasia povu mak nain ba poder, RTTL nu’udar mídia tenke fornese informasaun no opiniaun oioin hodi hakbiit povu hanesan nain ba poder”, katak.
Naldo dehan bainhira halo mudansa ruma, presiza servisu maka’as la’ós ko’alia de’it, hodi impresta lia-fuan saudozu Komisáriu Polítika ba Informasaun, Ajitasaun no Propaganda nomos Sekretáriu Ezekutivu ba Luta Frente Klandestina, Keri Laran Sabalae, katak povu mak sei julga prestasaun servisu hosi rezultadu ne’ebé hatudu. Se la’e hanesan bidon mamuk hatene halo lian boot de’it, maibé isin mamuk.
Hirak ne’e presiza ema hotu iha RTTL hamutuk hodi hametin unidade, hala’o kna’ar ho profesionalizmu ho kualidade. “Ohin ha’u promete haka’as-án atu servisu hamutuk ho ha’u nia ekipa RTTL tomak hodi alkansa mehi ne’ebé hothotu hakarak hetan”.
Dirijente ne’e afirma sei ko’alia uitoan hodi servisu mak barak. “Nelson Mandela hatete kada ema ida bele rezolve sira nia kondisaun hodi hetan susesu bainhira sira iha dedikasaun no motivasaun maka’as ba buat ne’ebé sira halo”, hasara Naldo.
Hatutan tan, instituisaun ne’e tenke sai mensajeiru entre Estadu ho povu hodi haktuir faktu no sai fatór determinante hodi promove dame liuhosi informasaun ne’ebé kredivel, edukativu ho responsabilidade iha komunidade nia leet.
Ho mehi ne’e, nia dehan triste ho situasaun infraestrutura atuál kuandu udan boot monu-rai. Tanba ne’e, nia ho esperansa ida katak RTTL tenke sai sentru jurnalizmu kreativu ho ambiente ne’ebé naton hodi bele kompete jurnalista sira seluk iha mundu.
“RTTL nia futuru sei di’ak liu bainhira entidade hothotu hakarak hamutuk hodi dezenvolve sai hanesan Ramelau hodi dignifika eroi ho dignidade”.
Lia-fuan ikus ne’ebé nia hato’o ba RTTL no entidade tomak atu servisu hamutuk hodi alkansa mehi di’ak. Hamutuk mak bele no forte hodi haburas Timor no halakon kiak, mukit, moras no injustisa sosiál.
Entretantu, Primeiru-Ministru, Marí Alkatiri, konsidera kna’ar ne’ebé Naldo simu ho dezafiu tanba liga ho situasaun agora hodi hakat ba eleisaun antesipada.
Tanba ne’e, Xefe Ezekutivu ne’e husu atu marka diferente katak labele hamosu diskriminasaun no imparsiál. “Respeita ida ne’e importante”, afirma Xefe Governu iha ninia mensajen.
Nu’udar ulun boot ba órgaun ezekutivu sei kria kondisaun, la interfere servisu tomak, katak RTTL tenke servisu ho imparsiál no kredivel.
Jornalista: Rita Almeida