Reuniaun Komisaun Permanente Parlamentár Adia

0
109
PPN, Aniceto Guterres, akompaña hosi Vice PPN na’in rua ko’alia ba imprensa iha sala konferénsia Parlamentu Nasionál. Foto dokumentasaun

DILI, (TATOLI) – Prezidente Parlamentu Nasionál (PPN), Aniceto Guterres, hateten tuir loloos ohin halo ona reuniaun Komisaun Permanente Parlamentu Nasionál (PN) maibé partidu polítiku sira ba reune ho Prezidente Repúbliku, Francisco Guterres Lú Olo, entaun enkontru kanseladu no adia fali ba aban.

“Reunianu Komisaun Permanente adia ohin tanba partidu polítiku sira, hosi sira ne’ebé membru Komisaun Permanente balun ba enkontru ho Prezidente Repúblika, Lú Olo, iha Palásiu Prezidensiál Bairu Pité, nune’e ohin reuniaun kanseladu”, Aniceto Guterres ba jornalista sira iha PN, kuarta, (7/2).

Rezolusaun ba Komisaun Permanente aprova ona ho membru 29 no bankada hotu hatama ona naran no dadaun ne’e hein halo reuniaun de’it maibé ohin adia.

Hasoru malu ne’e entre deputadu sira iha komisaun permanente sei ko’alia asuntu importante sira maibé só Sekretáriu Jerál Parlamentu mak bele informa kona-ba asuntu ne’ebé sei diskute.

Membru parlamentu ne’ebé la tama iha Komisaun Permanente mós sei nafatin halo servisu iha Komisaun Espesializada no sei koordena ho Komisaun Permanente.

Nune’e membru parlamentu ne’ebé la tama Komisaun Permanete mós sei halo servisu nafatin maibé só akompaña de’it ba servisu governu nian maibé labele halo fiskalizasaun.

Enkuantu, membru parlamentu sira ne’ebé la servisu iha komisaun permanente mós sira nia saláriu mantein nafatin tanba konstituisaun mak dehan labele prejudika sira nia mandatu enkuantu deputadu foun seidauk eleitu.

“Sira labele halo servisu barak tanba parlamentu disolvidu ona signifika labele aumenta servisu barak eh labele inventa servisu atu ema dehan deputadu sira servisu duni”, dehan.

Maibé membru parlamentu labele uza instrumentu fiskalizasaun atu debate mosaun sensura, sé governu lakohi mai oinsá mak bele diskute tanba parlamentu disolvidu ona oinsá bele halo mosaun sensura ba governu.

Jornalista: Zezito Silva

Editora: Rita Almeida

HUSIK IDA HATÁN