Restaurante Kuaze 12 Sei Taka Iha Semana Ne’e

0
577
Koordenadór AIFAESA, Abilio Oliveira Sereno. Foto Tatoli/Egas Cristovão

DILI (TATOLI)- Autoridade Inspesaun no Fiskalizasaun ba Atividade Ekonómika no Sanitária (AIFAESA) deside sei taka restaurante kuaze 12 hafoin halo levantamentu ba restaurante sira iha Dili laran ne’ebé besik  estabelesimentu 64.

Koordenadór AIFAESA, Abílio Oliveira Sereno, informa restaurante 12 ne’ebé mak sei taka ne’e tanba viola (lá tuir) dekretu lei ne’ebé regula ijiene númeru 28/2011. AFIAESA deside taka maibé ida ne’e la’ós desizaun ida atu taka permanente maibé sei fó tempu hadi’a kondisaun restaurante tuir lei haruka (regula).

“Dala barak dapur no sintina hamutuk, tau sasán mós la tuir dekretu lei regula ijiene ne’ebé hatete restaurante ida atu loke nia atividade tenke tuir regra”, Abílio hatete ida ne’e hafoin hasoru malu ho Prokuradór Jerál Repúblika iha Kolmera, ohin.

Ho ida ne’e maka AIFAESA husu ba entidade ne’ebé hasai lisensa (SERVE, MCI ho Turizmu) bainhira AIFAESA taka tiha estabelesimentu ne’e maka instituisaun kompetente presiza atu halo vistória no bainhira aprova ona vistória ne’e hodi dehan bele loke ona mak foin autoriza fali sira atu kontinua atividade.

“Ami husu koordenasaun no kooperasaun másimu husi instituisaun sira ne’ebé fó lisensa atu koopera ho ami para bele haree situasaun ne’e. dala ruma fó tiha lisensa ba restaurante sira, maibé bainhira AIFAESA haree situasaun iha estabelesimentu ne’e lá respeita lei ne’ebé regula ijiene, hanesan restaurante sira ne’ebé tama ona iha lista atu taka ne’e tantu iha lisensa mas kondisaun ijiene la permite para sira loke.”

(Jornalista : Maria Auxilidora)

(Editór : Manuel Pinto)

HUSIK IDA HATÁN