Programa Sétimu Governu Sei Nakfilak Ba Matéria Kampaíña

0
290
Primeiru-Ministru, Marí Alkatiri, ko'alia ba jornalista sira hafoin hasoru Prezidente Repúblika, Francisco Guterres Lú Olo, iha Palásiu Prezidente Nicolau Lobato Bairo Pité, ohin. Foto mídia PR

AILEU (TATOLI)—Primeiru Ministru, sétimu governu konstitusionál, Mari Alkatiri fó sai katak partidu Fretilín ho Partidu Demokrátiku (PD) sei lori programa sétimu governu ne’ebé hetan rejeisaun hosi bloku opozisaun iha Parlamentu Nasionál, nu’udar matéria ba kampaíña, Eleisaun Antisipada.

“Eleisaun agora ne’e, saida mak FRETIN no PD sei lori ba povu mak programa governu dahituk, la presiza tan buat seluk tanba ida ne’e ami nia programa atu lori ba povu no atu serve povu,” Sekretáriu Jerál Partidu Fretilín ne’e deklara iha diálogu konaba programa governu ho entidade hotu iha Salaun Timor Klaran Aileu, horisehik.

Nia dehan iha programa governu ne’ebé bloku opozisaun (CNRT, PLP, KHUNTO) rejeita foku ba hadi’a edukasaun, saúde, agrikultura, bee moos.

Nune’e mós, hakarak harii hela fatin ba povu ho dignidade, inklui programa edukasaun inkluziva, saúde inkluziva no seluk tan.

“Se Maromak fó vida mai ha’u, ha’u tenke kumpre promesa hodi halo servisu. Ema barak uluk la gosta ha’u maibé agora komesa komprende ona,” Alkatiri dehan.

Opozisaun Rejeita Programa Governu

Bankada opozisaun CNRT, PLP no KHUNTO iha Parlamentu Nasionál halo mosaun rejeisaun ba programa VII governu konstitusionál ne’ebé aprezenta iha uma fukun ho votus afavor 35 no kontra 30.

Primeiru Ministru, Mari Alkatiri iha momentu ne’e dehan, programa hot-hotu ne’ebé mak governu aprezenta liga ho vida povu no dezenvolvimentu iha rai Timor.

Maibé Opozisaun rejeita tanba ódiu no vingansa ba governu.“Ha’u husu ba povu tomak atu hakmatek nafatin akompaña prosesu ne’e ita foin mak komesa no seidauk to’o iha fim no prosesu ne’e foin mak komesa no ha’u dehan ha’u nia Irmaun Xanana mai ha’u sei ko’alia atu ami na’in rua tuur hamutuk atu ko’alia kona ba governu ne’e,” Alkatiri deklara iha momentu ne’e.

(Jornalista: Julia Chatarina)

(Editór : Manuel Pinto)

HUSIK IDA HATÁN