Programa Governu Prevé Edukasaun Inkluziva

0
64
Konsultasaun Programa Sétimu Governu Konstitusionál iha Parókia Santo António Manatuto, sesta (16/2). Imajen Ajénsia Tatoli/Xisto Freitas).

MANATUTO, (TATOLI) – Primeiru Ministru, Marí Alkatiri, hateten programa Sétimu Governu Konstitusionál ne’ebé rejeitadu hosi bankada opozisaun Parlamentu Nasionál prevé mós edukasaun inkluziva.

Nia esplika edukasaun inkluziva ne’e signifika eskola sira tenke admite balansu jéneru nomós kria kondisaun ba ema ho difisiénsia sira atu hetan oportunidade ba eskola.

“Ema ho defisiénsia la’ós ema ida inválidu. Sira só defisiénsia mentál maibé sira mós iha liman, iha isin no kakutak atu hanoin. Tanba ne’e ita tenke fó atensaun ba sira”, Xefe Governu hato’o iha aprezentasaun programa Sétimu Governu Konstitusionál ba autoridade munisípiu, autoridade lokál, veteranu, reprezentante Igreja Katólika no komunidade sira hosi Munisípiu Manatuto ne’ebé hala’o iha salaun Parókia Santo António Manatuto, sesta (16/2).

Marí hatutan programa Governu mós hakarak estabelese kuríkulu edukasaun ho durasaun tinan sanulu, nune’e tinan-tinan labele muda kuríkulu.

“Ida ne’e fasilita labarik sira sai alunu ida kualidade hanesan saida maka inan-aman sira hein durante ne’e”, esklarese.

Nia dehan Governu ida ne’e mós halo ona revizaun ba dekretu lei rua atu hahú fali kuríkulu ida ne’ebé lian Portugés no Tetun maka sei sai lian ensinu ninian no hatutan katak lian materna tenke mantein maibé labele sai lian ensinu.

Nia promete Governu sei lori programa hirak ne’e ba eleisaun antesipada hanesan programa eleitorál ida no programa ida ne’e mós sei sai programa Oitavu Governu Konstitusionál, kuandu partidu rua (FRETILIN-PD) hetan fiar hosi povu iha eleisaun antesipada.

“Se lideransa Governu foun maka ida ne’e nafatin, programa Sétimu Governu sei sai programa Oitavu Governu Konstitusionál tanba ami fiar katak programa ida ne’e di’ak liu-ba povu Timor-Leste”, afirma.

Jornalista: Xisto Freitas

Editora: Rita Almeida

HUSIK IDA HATÁN