Prezidente Partidu CNRT Husu Kuadru no Militante Labele Sai Yes Man

0
1776
Prezidente Partidu CNRT, Kay Rala Xanana Gusmão.

DILI, (TATOLI) – Prezidente Partidu Kongresu Nasionál Rekonstrusaun Timor (CNRT-sigla portugés), Kay Rala Xanana Gusmão, husu ba kuadru no militante partidu CNRT atu labele sai yes man no yes pak, maibé oinsá atu hametin kultura diferensa opiniaun.

“Hakiak kultura respeita malu, no respeita opinian ema seluk nian para hametin kultura diferensa opiniaun iha partidu laran. La’e! Ita sai hotu kuadru militante yes man no yes pak”, hatete iha ninia mensajen ho vídeo  ba konferesista sira iha Sentru Konvensaun Dili (CCD-sigla portugés), ohin.

Eis Prezidente Repúblika dahuluk ne’e mós apela ba kuadru no militante partidu atu hamoris espíritu umildade, loke laran hodi aprende no aprende beibeik hodi soe arogansia katak ita mak hatene buat hotu no liu ema seluk.

“Haburas espíritu simplisidade no hamoris prátika krítika no auto-krítika iha ita nian leet no partidu laran, tanba só rekoñese sala mak hodi ita bele kontribui di’ak liután hodi hametin no haboot ita nian partidu”, realsa eis Primeiru-Ministru ne’e liuhosi vídeo.

Ulun boot partidu CNRT ne’e hatutan iha nia mensajen atu kuadru partidu sira soe individualizmu no obsesaun nomós halakon atetude defende án hodi buka hatene rona malu, diskute no hakruk ho kakutak no laran malirin. “Tanba partidu tenke hatudu katak interese povu nian aas liu ita idaidak nian interese”, afirma.

Hodi afirma tan: “Halakon tiha atetude oportunizmu hodi lori partidu nia naran ba buka osan tun sa’e, mas partidu la haree osan nia klamar tan (ho hamnasa kiik), simu tiha osan la halo buat ida e partidu lakon tan eleisaun, ita la hanoin”.

Nune’e mós husu atu halakon mentalidade hodi ko’alia a’at de’it ema seluk no nunka rekoñese sala rasik. Hodi realsa hakiak espíritu onestidade nian hodi evita manipula opiniaun públika kona-ba saida de’it mak partidu hakarak hala’o.

Konferénsia extra-ordináriu loron sorin ne’e hala’o ho ajenda mak leitura no aprovasaun rejimentu konferénsia extra-ordináriu, leitura no aprovasaun karta kredensiál, aprejentasaun no aprovasaun rezolusaun rua inklui akompaña mensajen Prezidente Partidu ba estrutura partidu hosi nasionál to’o baze.

Loron ne’ebé hanesan partidu sira iha Aliansa Mudansa ba Progresu (AMP) halo atividade hanesan no tuir ajenda orastán loraik, AMP sei halo deklarasaun hamutuk iha CCD.

Jornalista: Rita Almeida

HUSIK IDA HATÁN