PR Simu Tan Kredensiál Hosi Nasaun Haat

0
92
Embaixadóra Austrália, Peter Llewelyn Roberts, bainhira entrega karta kredensiál ba Xefe Estadu iha Palásiu Prezidensiál, kinta, (22/2).

DILI, (TATOLI) – Prezidente Repúblika, Francisco Guterres Lú Olo, kinta (22/2) simu tan kredensiál hosi reprejentante nasaun haat hanesan Austrália, España, India no Nijéria iha Palásiu Prezidensiál Nicolau Lobato Bairo Pité.

Embaixadóra Austrália, Peter Llewelyn Roberts, sei hatutan relasaun diplomátika ne’ebé estabelese ona dezde 20 maiu 2002.

Tuir nota komunikadu ne’ebé Tatoli simu ohin hosi mídia Palásiu Prezidensiál katak, área kooperasaun ne’ebé Australia halo ho Timor-Leste mak infraestrutura no komérsiu, seguransa no defeza, agrikultura no  peska, boa governasaun, saúde, rezilénsia konstrusaun no suporta iha dezenvolvimentu enjerál.

Entre 2014 too 2015, ema Austrália hamutuk 15.600 mak vizita ona TL no ema hamutuk 10.540 ho rezidénsia iha Austrália mak moris  iha Timor.

Entretantu embaixadór Reino España  akreditadu mak José Maria Matrés Manso, maibé hela iha Repúblika Indonézia.

Bainhira Nasaun ne’e restaura independénsia iha 20 maiu 2002, Reinu España estabelese kedas nia relasaun diplomátika  ho TL.

Kooperasaun sira ne’ebé Timor-Leste hala’o ho Reinu España hahú husi “Projeto de Convénio Basico de Cooperação” ne’ebé asina iha 2017 ho durasaun tinan lima. Projetu ne’e mós hetan ratifikasaun hosi Parlamentu Nasionál iha 2010.  Ajénsia Kooperasaun Internasionál España, AECID, kontribui mós apoiu dezenvolvimentu área rurál iha Timor, tinan hirak liuba.

To’o  oras ne’e, Timor-Leste seidauk iha nia reprezentasaun diplomátika ka konsuladu iha España.

Hosi India, Pradeep Kumar Rawat  mak  embaixadór akreditadu, hanesan mós ho Reinu España, nia sai mós hanesan Embaixadór India ba Indonézia.

Ba estudante sira timoroan, Governu Indianu oferese bolsu estudu iha area teknolojia informasaun, enjenéiru petróliu no saúde, iha nível lisensiatura, pós-graduasaun no doutoramentu.

Iha tinan-2008, Governu indianu aprova subsídiu ba projetu infraestrutura iha Timor ho valor osan $100.000.00. Maibé, oras ne’e Timor seidauk iha  Embaixada iha fatin ne’e.

Nune’e mós, embaixadór  akreditadu  Nijéria, Hakeem Toyin Balogun mak sei reforsa kooperasaun entre nasaun rua, ne’ebé hahú ona desde 2004.

Hakeem Balogun sai mós hanesan Embaixadór Nijéria nian ba Indonézia.  (ki)

HUSIK IDA HATÁN