Polítika Nasionál Turizmu Ho Proridade Lima

0
111
Ministériu Turizmu hala'o dezeminasaun ba Polítika Nasionál Turizmu iha Sentru Konvensaun Dili, ohin. Foto Midia MT/ Isac

DILI, (TATOLI) – Ministru Turizmu (MT), Manuel Vong, hatete Polítika Nasionál Turizmu iha prioridade lima ne’ebé ema hotu presiza atu hatene mak turizmu hanesan prioridade ne’e rasik, turizmu lori prosperidade, fó protesaun, fó atensaun ba parseria ne’ebé mak iha no turizmu tende sentralizadu ba ema.

“Iha nasaun ida ne’e ita-nia ekonomia depende ba buat tolu tuir planu estratéjiku 2011-2030, ida mak minarai mas ne’e loron ida sei maran, tanba ne’e ita presiza tebes iha dezenvolvimentu ekonómiku ida ne’ebé mak sustentavel, setór agrikultura hanesan prioridade ida no seluk mak turizmu ne’e rasik”, Vong hatete iha ámbitu diseminasaun Polítika Nasionál Turizmu iha Sentru Konvensaun Dili, ohin.

Tanba ne’e presiza dezenvolve turizmu atubele kria kampu traballu, oportunidade no lori benefísiu ekonómiku ba rai ida ne’e.

“Turizmu ne’e atu lori prosperidade. Iha mundu oras ne’e ema hotu preokupa buat ida ki’ak, Timór mós iha nia problema pobreza oinsá mak turizmu atu lori moris di’ak ba ema, tanba ne’e turizmu tenke fó prioridade atu redús pobreza ne’e rasik liuhusi ita-nia investimentu ne’ebé halo, liuhusi polítika ne’ebé hola, liuhusi planu hirak ne’ebé mak ita ezekuta”.

Prosperidade ne’ebé iha tanba turista ida mai nia lori osan atu gasta no entidade hotu ne’ebé presta serbisu ba turista ida, hotu-hotu hetan nia benefísiu, tanba ne’e prosperidade sai hanesan preokupasaun boot Governu atu redús ki’ak ida ne’e liuhusi atividade turístika.

Aleinde ne’e priodade seluk mak fó protesaun ba rekursu naturál no kulturál. “Se ita dehan turizmu tenke la’o, ema mai atu haree saida? Normalmente natureza, ita-nia tasi, ita-nia foho sira ne’e hotu sai hanesan atrasaun turístika ne’ebé mak natureza oferese, ita sei lahalo tan tasi, maibé tasi kuandu fo’er ema sei labá, tanba ne’e mai ita prezerva ita-nia tasi ne’ebé mak furak. Ita-nia kultura ne’ebé mak riku tebes, se ita husik ita-nia kultura rasik ema lakohi mai haree tanba iha fatin seluk di’ak liu”.

Maibé ho natureza kulturál ne’ebé Timor-Leste iha sai hanesan atrasaun turístika ida ne’ebé potensiál tebes.

Nune’e mós fó atensaun ba parseria ne’ebé iha mak entre públika, setór públiku mak Governu nomós setór privadu.

“Tanba ne’e ita sei harii autoridade nasionál turizmu ida ne’ebé mak jere indústria turizmu ne’ebé mai husi membru ou parseria husi públiku ou privada atubele implementa polítika ida ne’e. Se ida ne’e mak halo, partisipasaun ita hotu nian, parseria ne’e sei iha frutu, sei iha benefísiu ba ita hotu”.

Ikus liu mak polítika nasionál turizmu sentralizadu iha ema. Atu dezenvolve rai ida ne’e ho di’ak liuliu iha setór turizmu, ema mak tende ser sai sentru.

“Ita prepara ema tanba ita lakohi sai fali bainaka iha ita-nia rai rasik. Se ita hakarak harii cinco estrelas, ita prepara lai ema mas se la’e mós ita hahú husi ita-nia uma laran. Ema ne’ebé mak tenke iha kompeténsia, koñesimentu, skill no iha atetude ne’ebé mak di’ak. Se ita bele halo investimentu ida ne’e, iha polítika ida ne’e lori duni ita ba dezenvolvimentu katak ema sai hanesan sentru”.

Ho ida ne’e sei hetan benefísiu tanba invetimentu ne’ebé halo no polítika ne’ebé implementa sei lori benefísiu ba iha makro ekonómiku liuliu kriasaun kampu serbisu, redusaun pobreza, aumenta taxa no hamenus dependénsia ba importasaun.

Jornalista: Maria Auxiliadora

Editora: Rita Almeida

HUSIK IDA HATÁN