PM Sei Halo Diálogu ho Komunidade Bobonaro

0
153
Primeiru-Ministru, Marí Alkatiri.

DILI, (TATOLI) – Primeiru-Ministru, Marí Alkatiri, aban sei halo diálogu ho komunidade munisípiu Bobonaro kona-ba programa Governu nian.

Tuir komunikadu ne’ebé Tatoli asesu ohin haktuir objetivu husi diálogu ne’e Governu hakarak  esplika diretamente programa governu konstitusionál dahituk nian ba komunidade no governu mós hakarak rona hosi organizasaun sosiedade sivíl, xefe suku sira, veteranu, organizasaun feto no mós joven sira kona-ba sira nia preokupasaun, hanoin, no hakarak ba dezenvolvimentu nasionál.

Diálogu ne’e sei marka prezensa hosi Ministru Estadu no Rekursu Minerais. Mariano Sabino Lopes  Assanami, Ministru Prezidénsia Konsellu Ministru, Adriano Nascimento no Sekretáriu Estadu ba Konsellu Ministru no Komunikasaun Sosiál, Matías Boavida.

Diálogu sei hahú tuku 9.00 no sei hetan partisipasaun husi Xefe Suku husi Munisípiu Bobonaro tomak hamutuk na’in 52. Partisipa mós reprezentante sira husi veteranu sira, Igreja Katólika no konfisoen relijiosa sira, professór sira, sosiedade sivíl no reprezentante komunidade.

Husi autoridade lokál sira sei partisipa Prezidente Autoridade Munisípiu Bobonaro, Administradór Postu na’in neen, no Ofisiál Administrasaun Lokál, liliu husi Saúde no Edukasaun.

Molok atu halo diálogu, komitiva husi governu sei halo vizita kortezia ba Amu Bispu Maliana, Dom Norberto do Amaral.

Diálogu remata komitiva sei hala’o vizita ba obras iha Maliana. (ki)

HUSIK IDA HATÁN