PM no PR Diskute Loron Eleisaun

0
272

DILI (TATOLI)–Primeiru Ministru (PM), Mari Alkatiri hala’o enkontru ho Prezidente Repúblika (PR), Francisco Guterres Lú Olo, hodi ko’alia kona-ba markasaun loron eleisaun antesipada.

Tuir kalendáriu Governu, Xefe Governu esplika, eleisaun akontese dentru loron 60, hafoin Prezidente Repúblika deklara eleisaun, maski nune’e, Prezidente Repúblika de’it maka dekreta loron eleisaun.

“Prezidente sei konvoka fali enkontru ho STAE no CNE para bele estuda atu marka loron eleisaun,” Mari hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, kinta ne’e.

Nia dehan, lalika preokupa demais ba orsamentu eleisaun ninian tanba Governu halo hela jestaun katak orsamentu sei iha atu organiza eleisaun no atende nesesidade sira seluk.

“Tinan kotuk ita hala’o eleisaun tolu (eleisaun prezidensiál ne’ebé prevee mós orsamentu ba segunda volta maski la konsege ba segunda volta no eleisaun Parlamentár) ne’e governu aloka orsamentu 10 millions. Maibé agora eleisaun ida de’it, entaun sei gasta metade hosi 10 millions,” nia esplika.

(Jornalista: Xisto Freitas)

(Editór : Manuel Pinto)

HUSIK IDA HATÁN