PM Lansa Sistema Interligasaun

0
620
Ministru Planu no Finansa, Rui Gomes, ho Governadór BSTL, Abraão de Vasconcelos, bainhira lansa sistema interligasaun ne'e iha edifísiu MF Aitarak-laran. Foto Fan page BSTL

DILI, (TATOLI) – Primeiru-Ministru, Marí Alkatiri, ohin lansa sistema interligasaun entre Planeamentu Rekursu Governu (GRP-sigla inglés) ho R-Timor (Rede Transferénsia iha Momentu Reál) ne’ebé aplika hosi Banku Sentrál Timor-Leste (BSTL).

ʺSistema foun ne’e sei apoiu aselera prosesu dezenvolvimentu ekonomia iha rai-laranʺ, hateten Xefe Governu hafoin lansa sistema interligasaun GRP ho R-Timor iha edifísiu Ministériu Planu no Finansa Aitarak Laran, ohin.

Xefe Ezekutivu ne’e esplika sistema foun ne’e sei apoiu prosesu transferénsia orsamentu ba programa governu nian hanesan idozu, bolsa da maẽ, merenda eskolár no seluk tan.

Entretantu Ministru Planu no Finansa,  Rui Gomes, hateten ministériu ne’e uza sistema foun ne’e iha segunda ne’e hodi tranfere osan via eletrónika internet ba konta bankária ba kompañia 29 ne’ebé iha kontratu ho Governu.

ʺEmpreza sira baibain halo servisu ita tenke selu, saláriu funsionáriu sira, idozu, veteranu durante ne’e ita halo liuhosi pagamentu em cash maibé agora ita uza sistema ne’e tama direta iha ema nia konta bankaria automatikamente, nune’e labele mosu manipulasaunʺ, dehan ministru.

Banku sentrál maka opera sistema ne’e hodi liga ho Banku komersiál hanesan Banku Nasionál Timor-Leste (BNCTL), Banku Nasionál Ultramarinu (BNU), Bank Rakyat Indonézia (BRI) no Bank Mandiri.

ʺBanku sira ne’ebé iha ligasaun ho R-Timor, menus de’it Banku Austrália-Novazelándia (ANZ)ʺ.

Tanba ne’e governu garante prosesu transferénsia ba ezekusaun Orsamentu Jerál Estadu sei la’o lais, kredibel no seguru kompara ho antes ne’e prosesu pagamentu ba projetu ida bele akontese to’o loron 4.

ʺSistema foun ne’e bainhira ministériu tranfere de’it minutu ida ka rua bele tama kedas ona iha  ema nia konta bankariaʺ, tenik.

Interligasaun GRP ho R-TiMOR sei permite Ministériu Planu no Finansa halo automatizasaun pagamentu eletronikamente hosi GRP ba klinte sira nia konta iha banku komersiál sira liuhusi sistema R-TIMOR iha momentu real ou STP (Straight Through Processiing) no pagamentu refere tama kedas ba kliente sira nia konta bankária iha momentu segundu ou minutu balun nia laran.

Sistema ne’e sei kontribui mós ba efisiensia jestaun finansas públika no promove sistema finanseiru ne’ebé inkluzivu liután.

Jornalista: Agapito dos Santos

Editora: Rita Almeida

HUSIK IDA HATÁN