PJR Preokupa ho Kazu Sivíl

0
136
Prokuradór Jerál Repúblika (PJR), José Ximenes. Foto Tatoli/Egas Cristovão

DILI, (TATOLI) – Prokuradór Jerál Republika (PJR), Jose da Costa Ximenes, ohin hala’o enkontru ho Prezidente Repúblika, Francisco Guterres Lú Olo, hodi hato’o preokupasaun kona-ba serbisu tribunál nian.

Nia haktuir iha retiru anuál ne’ebé Ministériu Públiku realiza iha 12-13 janeiru foin lalais, Gabinete Kontensiozu hosi Ministériu Públiku hato’o preokupasaun katak Tribunál kuaze iha problema uitoan ba kazu sivíl sira.

“Tanba ne’e maka ami hanoin atu ko’alia ho parte tribunál haree mós serbisu espesializadu iha Gabinete Sentrál Kombate Korupsaun no Gabinete Kontensiozu iha Ministériu Públiku nia tutela ne’ebé kaer kazu sira kona-ba administrasaun (sivíl)”, José Ximenes hato’o informasaun ne’e ba jornalista sira iha Palásiu Prezidente Nicolau Lobato, Bairru Pité hafoin hasoru malu.

Nia hatutan kazu barak maka Ministériu Públiku reprezenta Estadu halo asaun kontra sidadaun singulár no koletivu, maibé kazu sira ne’e pendente iha Tribunál Distritál no la inklui Kazu disputa sira ne’ebe komunidade halo.

Aleinde ne’e, Prokuradór Jerál mós informa ba Xefe Estadu sobre kontentór hamutuk sia ne’ebé foin lalais Polísia prende iha Portu Dili. Ministériu Públiku serbisu hamutuk ho PNTL konsege halo apreensaun ba kontentór sia ne’e.

“Indikasaun forte katak materiál balun iha kontentór ne’e ho risku boot liu. Tanba ne’e, ami aprezenta ba primeiru interrogatoriu, ikus mai Tribunál hatún desizaun aprezentasaun periodika ba kontentór nia na’in”, dehan.

Hanesan sidadaun, Prokuradór Jerál hateten ninia parte simu desizaun tribunál, maibé lei mós fó dalan ba sira atu halo rekursu ba desizaun Tribunál Distritál Dili.

“Ita-boot (jornalista sira) bele imajina to’ok, sidadaun estranjeira ita fó desizaun aprezentasaun periodika ne’e nia ba hela iha ne’ebé maka atu halo aprezentasaun periodika? Tanba ne’e maka ha’u preokupa”, kestiona.

Nia haktuir ekipa ida hosi PNTL inklui mós prokuradór ida oras ne’e iha hela Indonézia atu halo teste ba matéria sira ne’ebé iha kontentór sia ne’e nia laran.

“Ita hotu imajina to’ok, se kontentór hirak ne’e tula hosi Singapura atu lori ba Indonézia, nusa la lori ba Indonézia, maibé to’o fali iha Timor maka atu lori fali ba Indonézia? Ida ne’e Ita labele konsidera”, realsa.

Kestaun daruak, nia informa mós kona-ba Konsellu Superiór aprova giaun iha tinan kotuk hodi halo Inspesaun Ordináriu ba prokuradór sira ne’ebé serbisu kompletu durante tinan tolu ona, nomos halo inspesaun ba dahuluk ba ofisiál justisa sira para bele hetan promosaun.

José tenik, sira mós halo Inspesaun Extraordináriu ba serbisu balun ne’ebé la’o ladun di’ak.

Jornalista: Xisto Freitas

Editora: Rita Almeida

HUSIK IDA HATÁN