Peskiza Preliminária La’o Hamutuk Hatudu Dezafiu Ba Prosesamentu Produtu Agríkola

0
139
Foto/Google.

DILI, (TATOLI) – Peskiza preliminária ne’ebé halo husi Organizasaun Naun Governamentál (ONG), Lao Hamutuk ne’ebé liga ba dezenvolvimentu indústria ki’ik liuliu ba prosesamentu produtu agríkola hatudu iha dezafiu liuliu ba matéria prima, merkadu ne’ebé laiha, ekipamentu ne’ebé seidauk suporta no fatin produsaun ne’ebé seidauk apropriada.

Peskizadór Lao Hamutuk iha asuntu agrikultura, Mariano Ferreira, hatete metodolojia ne’ebé uza iha peskiza ne’e hodi deskobre dezafiu no poténsia mak halo vizita bá kada grupu iha munisípiu Baukau, Ainaru, Suai, Maliana no Dili hodi halo entrevista, diskusaun, observa, nomós haree impaktu direta ne’ebé grupu sira halo liga ho atividade indústria ki’ik.

Haree ba produtu agríkola ne’ebé agora fa’an iha supermerkadu, dalaruma iha feira ne’ebé Governu promove atu fa’an produtu lokál bolu ONG ne’e nia atensaun atu hatene dezafiu saida mak sira iha, poténsia no oinsá sira bele rezolve ekonomia ho serbisu ne’ebé halo.

“Iha dezafiu boot lubuk ida mak enfrenta maka bainhira sira halo prosesamentu ba produtu ruma hanesan marmelada fore-rai no dalaruma sira bá buka fore-rai ne’e atu sosa laiha tiha, entaun ida ne’e problema ida ho matéria prima, ema barak lahalo produsaun ba ida ne’e antaun sira rasik labele ajuda atubele halo produsaun ruma ne’ebé bele fornese mai merkadu”, Mariano hatete iha Komoro, ohin.

Aleinde ne’e halo mós produsaun mina-nuu virjen, maibé tuir peskiza ne’ebé halo grupu sira dehan se nuu sira hola hotu ona, dalaruma ema hatene ona atu komesa hasa’e folin entaun tenke sosa iha fatin dook, automátikamente uza transporte ne’ebé karun uitoan atubele sosa no lori bá sira-nia fatin.

“Hafoin halo tiha produsaun problema seluk mak atu lori produtu sira nee mai iha Dili enfrenta ona problema tanba produsaun uitoan de’it depois kustu ne’ebé gasta boot demais entaun halo serbisu maka’as maski iha inisiativa forte, maibé labele apoiu ekonomia”.

“Ida ne’e mak buat prinsipál ne’ebé ami hetan, ida mak matéria prima, kustu transporte no ekipamentu ne’ebé atu ajuda sira. Ita hatene katak Governu, ONG ajuda ekipamentu balun mas ne’e ki’ik liu, agora ita hanoin atu dezenvolve indústria sai boot no haforsa ita-nia ekonomia ho ekipamentu ki’ikoan sira hanesan ne’e, ita sei lahalo buat ida”.

Dezafiu seluk mak fatin atu halo prosesamentu tanba dalabarak mak sira halo iha uma ho fatin ne’ebé ki’ik no haree katak ne’e lapropriada atu halo prosesamentu sira hanesan ne’e.

“Ita espera katak ho aprezentasaun sira hanesan ne’e liuliu Ministériu Komérsiu, Governu bele haree ona katak ida ne’e tuir loloos poténsia atubele dezenvolve ita-nia ekonomia entaun Governu tenke tau iha sira-nia planu oinsá fó apoiu, treinamentu, fasilidade nomós prepara infraestrutura sira, haforsa ita-nia inan-feton sira halo produsaun”.

Nune’e peskiza ne’e atu fahe informasaun ba públiku nomós ba ministériu relevante atu halo programa ka planu ruma bele uza informasaun ne’ebé mak iha no deskobre mós katak poténsia boot ne’ebé iha maka komunidade iha inisiativa atu halo produsaun, iha produtu agrikutura barak ne’ebé ohin loron seidauk halo prosesamentu, no merkadu ne’ebé sai hanesan poténsia no dezafiu.

Ministru Komérsiu no Indústria (MKI), António da Conceição, hatete hatán ba iha ida ne’e tenke halo medida polítika hodi responde ba saida mak ONG Lao Hamutuk observa.

“Iha semana kotuk liubá Ministériu Komérsiu lori ona ba iha Konsellu Ministru dekretu lei ne’ebé aprova estabelesimentu Instituto de Qualidade. Institutu ne’e importante atubele eziste hodi nune’e nia bele halo estandarizasaun produtu, sertifikasaun produtu para nune’e nia bele hatama sasán sira ne’e ba mas ne’e sekuénsia, prosesamentu iha no nia tenke halo estandarizasaun”.

Atubele benefisia produtu tama iha merkadu maka institutu mós tende hola responsabilidade ba ida ne’e.

Jornalista: Maria Auxiliadora

Editora: Rita Almeida

HUSIK IDA HATÁN