Peska Ilegál Barak Iha Tasi Timór

0
130
Ministru Estadu no Ministru Agrikultura no Peska, Estanislau Aleixo da Silva.

DILI, (TATOLI) – Ministru Estadu no Ministru Agrikultura no Peska (MAP), Estanislau Aleixo da Silva, hatete daudaun ne’e peska ilegál iha tasi Timor liu ró 30, maibé Timor-Leste laiha kapsidade atu kontrola.

“Uluk kuandu ró Hong Long hakaer ikan iha ne’ebá peska ilegál kuaze laiha ona, agora barak loos. Ita laiha kapasidade atu kontrola peska ilegál tanba ne’e mak Governu hola desizaun fó lisensa ba kompañia sira para hakail iha ita-nia tasi para prezensa ita-nia ró iha tasi laran bele hasees peska ilegál”, Esatanislau hatete iha Komoro, ohin.

Mas daudaun ne’e ró ilegál liu 30 ba leten no rede ne’ebé ema sira utiliza atu hakail ikan laiha koñesimentu husi parte MAP nian no hakail ikan sai de’it mós lahatene tanba hala’o atividade ho ilegál.

“Agora sira na’ok hela de’it ita lahetan osan ruma, maibé bainhira ita fó lisensa ema hakail ita ko’alia loos ema sira ne’e dehan peska ilegál kuandu ema sira ne’e hetan lisensa para peska iha ita-nia rai-laran. Hanesan governante tenke hola desizaun polítika estratéjika hodi proteje ita-nia rekursu, pelu menus ita fó lisensa ema hakaer, lori mai ita hatene saida mak sira hakail no oinsá mak atu kontrola”.

Ho prezensa ró ilegál ne’e, daudaun MAP Timor-Leste iha ona sistema para haree ró hira mak halo peska iha tasi-laran.

“Apoiu Japaun nian ita iha komunikasaun via satélite hatene movimentasaun ró nian ne’ebé iha ita-nia tasi-laran. Loroloron liuhusi ita-nia tasi mane ne’ebá ne’e ró barak ne’ebé hakail iha ita-nia tasi no lori ba rai seluk, ita-nia viziñu balun”.

Ho ida ne’e Governu hola ona desizaun no sei komunika, maibé importante mak tenke diversifika ekonomia no utiliza rekursu, kontrola no buka meiu.

“Tanba ne’e foin lalais Governu mós simu ró rua ne’ebé Austrália fó mai para ajuda kontrola. Ita-nia ró rua ne’ebé agora iha ne’e laiha kapasidade atu bá kontrola iha tasi-laran”.

Sobre ró husi kompañia Best Seafoodes ne’ebé Indonézia kaer, ministru Estanislau hatete tuir versaun Timor-Leste nian Indonézia kaer ró iha territóriu Timór nian.

“Iha ita-nia tasi, ne’ebé ha’u rasik hakerek karta ba sira no hasoru malu ho ministra Indonézia hodi hatete ba nian ita-nia versaun mas sé mak sei aprezenta formalmente mak ami-nia Ministru Negósiu Estranjeiru. Ne’e duni Ministru Negósiu Estranjeiru parese bá to’o ona iha Indonézia ko’alia ho Ministra Negósiu Estranjeiru Indonézia no sei rezolve tanba ita-nia fronteira tasi ho Indonézia seidauk ida, sira dehan sira-nian, ita dehan ita-nian, ha’u fiar katak sira kaer iha ita-nia tasi-laran, sira-nia ró funu mak tama mai kaer iha ita-nia rai-laran la’ós ita-nia ró mak viola”.

Jornalista: Maria Auxiliadora

Editora: Rita Almeida

Notísia ne’ebé relasiona :

http://www.tatoli.tl/2017/12/ro-peska-ilegal-iha-duni-tasi-timor-nian/

HUSIK IDA HATÁN