Pasaporte Timor-Leste Okupa Fatin Di’ak iha Mundu

1
1629
Pasaporte Timor-Leste. Foto espesiál

DILI, (TATOLI) – Tuir Passport Index 2018 fó sai katak Timor-Leste nia kbiit pasaporte 64, nível mundiál okupa pozisaun 51 kompara ho nasaun viziñu Indonézia. Katak TL soe dook Indonézia dala-13.

“Pasaporte Timor mós okupa fatin di’ak iha mundu, la’ós de’it iha rejiaun aziátiku maibé iha mundu mós ita okupa pozisaun ida di’ak”, hateten Ministru Negósiu Estranjeiru, Aurélio Guterres, ba jornalista sira iha MNEK Praia dos Coqueiros, tersa ne’e.

Signifika, maske Timor-Leste foin hetan indepedénsia tinan 15 bele asesu ba nasaun 87 la ho viza duke nasaun viziñu Indonézia ukun aan tinan 73 maibé asesu de’it nasaun 68 sein viza.

Kompara ho nasaun CPLP (Comunidade dos Países da Língua Portuguesa), Timor-Leste nia pasaporte ranking sei do’ok husi Portugal (okupa pozisaun dahaat) no Brasil da-15. Nasaun CPLP seluk, Timor-Leste nia ranking sei tuur iha pozisaun di’ak.

“Ne’e ita bele dehan katak, país ne’e em termo de polítika, ekonomia no seguransa di’ak, ne’e mak influénsia mós ba uzu pasaporte. Ne’e buat ida la fásil, mezmu ita foin ukun aan tinan 15”, reforsa.

Pasaporte elektróniku nia sosializasaun komesa no la’o dadauk ona, hala’o husi Ministériu Justisa.

“Prosesu ne’e la’o hela ona. Hein katak iha tempu mai, ema hotu bele uza, sidadaun timoroan sira hotu bele uza pasaporte elektróniku ne’e”, governante ne’e espera.

Uluk seidauk iha pasaporte elektróniku, ba nasaun balun pasaporte nia kódigu ne’e sistema la lee. Agora lae, agora fasilmente lee. “Pasaporte elektrónika ita bele dehan kualker país, kualker sistema bele rekoñese”, konfirma.

Entretantu, nasaun sira iha mundu hetan ranking dahuluk tuir Passport Index 2018 mak Alemaña. Daruak Singapura, Dinamarka, Swedia, Finlandia, Itália, Fransa, España no Korea Sul. Datoluk mak Luzemburgu, Noruega, Olanda, Béljika, Austria, Portugal, Japaun no Reinu Unidu.

Jornalista: Rafy Belo

Editora: Rita Almeida

1 COMMENT

HUSIK IDA HATÁN